პარტია გირჩის წევრი, ალექსანდრე რაქვიაშვილი "კანონთან კონფლიქტში მყოფ არასრულწლოვანთა რეაბილიტაციისა და მხარდაჭერის ცენტრების" შექმნის ინიციატივას სოციალურ ქსელში გამოეხმაურა. მისი თქმით, მსგავსი პრაქტიკა უნგრეთშიც არსებობს, სადაც არასრულწლოვან ბავშვებზე "რეაბილიტაციის ცენტრებში" ძალადობენ. მისივე განმარტებით, "ასეთი ცენტრები ბავშვებზე ძალადობის მაღალ რისკებს აჩენს" და ცენტრების შექმნის სარგებელი მხოლოდ კანონპროექტის ავტორების ფანტაზიაში დარჩება.

"უნგრეთში დიდი სკანდალია. "არასრულწლოვანთა რეაბილიტაციის ცენტრში" ბავშვებზე ძალადობდნენ, მათ შორის სექსუალურად. უკვე პროტესტი ორგანიზდება ორბანის წინააღმდეგ. თუმცა ორბანის ბედი მე ნაკლებად მაღელვებს. ჩვენთვის ბევრად უფრო მნიშვნელოვანია, რომ ასეთი "ცენტრების" გახსნას აპირებს ქართული ოცნება და ამით გეგმავს არასრულწლოვნებს შორის კრიმინალის შემცირებას.

ქართული ოცნების და პოლიციის ხელში აღზრდილი ბავშვები" უკვე საშიშად ჟღერს, თუმცა ასეთი ცენტრები რომ ბავშვებზე ძალადობის მაღალ რისკებს აჩენს, საყოველთაოდ ცნობილი ფაქტია, და ეს კიდევ უფრო საშიშია. აგერ უნგრეთშიც იგივე მოხდა.

ჰოდა, ოცნების ინიციატივა, რომ არასრულწლოვანი დამნაშავეები ამგვარ ცენტრებში მოთავსდნენ — ისე უწყინარი არაა, ვიდრე ვინმეს ჰგონია. პირიქით, ის უამრავ რისკებს მოიცავს, მათ შორის იმისა, რაც უნგრეთში დაფიქსირდა, ხოლო სარგებელი მხოლოდ კანონპროექტის ავტორების ფანტაზიებში თუ დარჩება, რადგან ისედაც რთული ბედის ახალგაზრდა ასეთი "აღმზრდელების" ხელში რომ მოხდება, ის არასდროს დაადგება ნორმალური ცხოვრების გზას", — დაწერა ალექსანდრე რაქვიაშვილმა.

ცნობისთვის, ქართული ოცნება არასრულწლოვანებზე კანონის მიღებას გეგმავს, რომლის მიხედვითაც 14 წლამდე მოზარდები კანონის დარღვევის შემთხვევაში "სპეციალურ რეაბილიტაციის ცენტრში" მოიხდიან სასჯელს. კანონპროექტის მიხედვით, ამისთვის "დასაბუთებული ვარაუდი" უნდა არსებობდეს.

"კანონთა კონფლიქტში მყოფ არასრულწლოვანთა რეაბილიტაციისა და მხარდაჭერის შესახებ" – ასე ჰქვია კანონპროექტს.

საქართველოს კანონმდებლობით დანაშაულის ჩადენის შემთხვევაში 14 წლამდე მიუღწეველ პირებზე სამართლებრივი დევნა არ იწყებოდა. კანონპროექტის განმარტებით ბარათში ვკითხულობთ, რომ "ამგვარი ქმედების პრევენციის ეფექტიანი მექანიზმი არ არსებობს".

კანონის დარღვევის შემთხვევაში არასრულწლოვანი "სპეციალურ რეაბილიტაციის ცენტრში" მოიხდის სასჯელს —"ოცნების" ახალი კანონპროექტი