თეთრიწყაროს რაიონული სასამართლოს მოსამართლე ვლადიმერ ხუჭუამ ჯამში მის წარმოებაში არსებული 6 საქმე შეაჩერა და კონსტიტუციური წარდგინებებით საქართველოს საკონსტიტუციო სასამართლოს მიმართა. ის ტელეკომპანია პირველის ჟურნალისტთან საუბრისას ამბობს, რომ "ადამიანი, ვისაც არ აქვს საშუალება გადაიხადოს თანხა, განწირულია 30-დღიანი პატიმრობისთვის, რაც არის დაუშვებელია, ვინაიდან არ შეიძლება ადამიანი თავისი ეკონომიკური ან სოციალური მდგომარეობიდან გამომდინარე აუცილებლად უნდა იყოს პატიმრობაში".

"ჩემს მიერ სულ ჯამში შეჩერებულ იქნა ჩემს წარმოებაში არსებული 6 საქმე. მე ჩავთვალე, რომ ექვსივე საქმეში იყო ადამიანების უფლებების ფუნდამენტური უფლების დარღვევის საქმე და მიმაჩნია, რომ კანონები, რომლებიც მე უნდა გამოვიყენო არის კონსტიტუციის შეუსაბამო, ეს არის წვრილმანი ხულიგნობის და მოთხოვნისადმი დაუმორჩილებლობის მუხლები. საკითხი ეხება იმას, რომ ადამიანი, ვისაც არ აქვს საშუალება გადაიხადოს თანხა, ის არის განწირული უპირობო გრძელვადიანი, 30-დღიანი პატიმრობისთვის, რაც არის დაუშვებელი, ვინაიდან არ შეიძლება ეკონომიკური ან სოციალური მდგომარეობიდან გამომდინარე კანონმდებელმა დაადგინოს, რომ ის აუცილებლად უნდა იყოს პატიმრობაში და ამით შეიკვეცოს მოსამართლის დისკრეცია, არ ჰქონდეს საშუალება, რომ საკითხი განიხილოს ობიექტურად, ინდივიდუალურად და დაადგინოს სამართლიანი სახდელი. ჩემთვის არ აქვს მნიშვნელობა, თუ რომელიმე პოლიტიკური აქტორი, ჩემი როგორც მოსამართლის საქმიანობიას შეაფასებს, ეს ჩემთვის უმნიშვნელოა. მე მინდა ყველას ვუთხრა, რომ მე ვარ მართალი, მე ვარ ჩემი სინდისით, კანონით და სამართლის პრინციპების დაცვით შესაბამისი გადაწყვეტილების მიმღები პირი", — განაცხადა ვლადიმერ ხუჭუამ.