ოცნების პერმიერმინისტრმა, ირაკლი კობახიძემ ჟრნალისტებთან საუბრისას განაცხადა, რომ გასული წლის ნოემბერ-დეკემბერში მიმდინარე აქციების დაშლისას ყოველ დღე სუს-ის ბრიფინგზე გამოცხადებული ნივთიერებები გამოიყენებოდა. კობახიძის თქმით, ნებისმიერ საერთაშორისო სუბიექტს შეუძლია გამოითხოვოს ინფორმაცია.

"პირველი, არავითარი დარბევები არ ყოფილა — ეს არის უკვე ტყუილი. რაც შეეხება კონკრეტული სითხის გამოყენებას, უკვე ითქვა დაწვრილებით — ყველა დღეს ეხება ეს, მნიშვნელობა არ აქვს თარიღებს — მთლიანობაში, როდესაც იქნა გამოყენებული ყველა შემთხვევაში იქნა გამოყენებული ის ნივთიერებები, რომელიც იყო ნახსენები სახელმწიფო უსაფრთხოების სამსახურის ბრიფინგზე. ეს შეეხება უკლებლივ ყველა შემთხვევას, როცა იქნა გამოყენებული წყლის ჭავლი. შესაბამისად, ყველაფერი არის დღესავით ნათელი. ნებისმიერ საერთაშორისო სუბიექტს შეუძლია გამოითხოვოს ინფორმაცია. სრული გამჭვირვალობის მზაობა არის ჩვენგან. შესაბამისად, თემა არის დახურული", — განაცხადა ოცნების პრემიერმა, ირაკლი კობახიძემ ჟურნალისტის კითხვაზე რა ნივთიერება გამოიყენეს 2024 წლის 28 ნოემბრიდან 4 დეკემბრამდე პროტესტის მონაწილეების დარბევისას.

ოცნების პრემიერმინისტრის განმარტებით, განხორციელდა დოკუმენტაციის და თავად ნივთიერების ანალიზი, რასაც რამდენიმე დღე დასჭირდა.

"დოკუმენტაციის და თავად ნივთიერების ანალიზი განხორციელდა. ამას სჭირდებოდა რამდენიმე დღე და რამდენიმე დღეში დაიდო სრული მასალები გამოძიებასთან დაკავშირებით", — განაცხადა კობახიძემ.

კითხვაზე იყო თუ არა საპროტესტო აქციაზე რომელიმე დღეს გამხსნელად გამოყენებული, კანცეროგენი, რომელიც მძიმ დაავადებებს იწვევს, კობახიძემ უპასუხა, რომ ამ შემთხვევაში საავადმყოფოებში ძალიან დიდი მიმართვიანობა იქნებოდა, რაც, მისი თქმით, არ დაფიქსირებულა.

"ყველაფერი ითქვა. ესეთი რამე რომ ყოფილიყო გამოყენებული იქნებოდა ძალიან დიდი მიმართვიანობა.

[ჟურნალისტი: არ იყო დიდი მიმართვიანობა? 207-მა ადამიანმა მიმართა...]

5-მა მიმართა მსუბუქი ინტოქსიკაციით, რომლებიც გაეწერნენ მეორე დღესვე... მე მინდა გავიხსენო 9 აპრილის შემდეგ, როდესაც გამოყენებული იყო ქიმიური ნივთიერებები, პირველი სკოლის მოსწავლეებითაც კი, რომლებიც რამდენიმე დღის შემდეგ მივიდნენ სკოლაში, სავსე იყო მაშინდელი საავადმყოფოები. 9 აპრილის შემდეგ. რატომ? იმიტომ, რომ როცა გამოიყენებ ქიმიურ ნივთიერებას შეუძლებელია ამას არ მოჰყვეს ძალიან მძიმე შედეგები ადამიანების დიდ რაოდენობაზე, ხო? ამ შემთხვევაში, "თუთიყუშს დასცვივდა ბუმბულები" — აქამდე დახვედით", — თქვა კობახიძემ.