ოცნების ხელისუფლების პრემიერმინისტრმა, ირაკლი კობახიძემ ბრიფინგზე განაცხადა, რომ შინაგან საქმეთა სამინისტროს ნაციონალური მოძრაობის მმართველობის დროსაც არ გამოუყენებია აქციებზე დემონსტრანტების დასაშლელად ქიმიური ნივთრიერება "კამიტი" და BBC-ის გამოძიება სიცრუეა.

კობახიძის განმარებით BBC-ს გამოძიება ორ მიზანს ემსახურება — ჩამქრალი საპროტესტო მუხტის ხელოვნურად გაღვივებას და "ქართველი ხალხისა და მის მიერ არჩეული ხელისუფლების მიმართ შანტაჟის გაგრძელებას".

"კიდევ ერთხელ გვინდა, გამოვეხმაუროთ ტელეკომპანია BBC-ის მიერ გავრცელებულ ცრუ ინფორმაციას. როგორც მოგეხსენებათ, საკითხის დრამატიზებისთვის, BBC-მ გაავრცელა ცრუ ინფორმაცია იმასთან დაკავშირებით, თითქოს მიტინგის დაშლისას შსს-მ პირველი მსოფლიო ომის დროინდელი აკრძალული ნივთიერება — კამიტი გამოიყენა. შინაგან საქმეთა მინისტრმა საზოგადოებას უკვე საჯაროდ დაუდასტურა, რომ მიტინგის დაშლისას ნივთიერება კამიტი არათუ არ გამოყენებულა, არამედ შსს-ს ეს ნივთიერება არასოდეს, მათ შორის, ნაციონალური მოძრაობის მმართველობის დროსაც კი არ შეუძენია.

BBC-ს მიერ გავრცელებული ინფორმაციის საფუძველზე, სუს-მა დაიწყო გამოძიება და საკითხის ყველა დეტალის შესახებ საზოგადოებას სრული ინფორმაცია უმოკლეს ვადებში მიეწოდება. იმთავითვე ცხადია, რომ BBC-ს სიუჟეტი არის არამხოლოდ სიყალბე, არამედ უცხოური სპეცსამსახურების ხელწერით დაგეგმილი იაფფასიანი პროვოკაცია, რომელიც ორ მიზანს ემსახურება. პირველი — ჩვენი ქვეყნის არაკეთილმოსურნეებს სურთ, შექმნან საბაბი უკვე სრულად ჩამქრალი საპროტესტო მუხტის ხელოვნურად გასაღვივებლად და მეორე - ჩვენი ქვეყნის არაკეთილმოსურნეებს სურთ, შექმნან საბაბი ქართველი ხალხისა და მის მიერ არჩეული ხელისუფლების მიმართ შანტაჟის გასაგრძელებლად. რა თქმა უნდა, ამ ორი ამოცანის შესასრულებლად ეს სიუჟეტი ვერავითარ შემთხვევაში ვერ გამოდგება," — თქვა კობახიძემ.

კობახიძემ ასევე დასძინა, რომ ოცნებისთვის მნიშვნელოვანია BBC-მ პასუხი აგოს "ცრუ ინფორმაციის" გავრცელებაზე და ამ ფაქტთან დაკაშირებით ბრიტანეთის კომუნიკაციების მარეგულირებელ კომისიას და "საჭიროების შემთხვევაში" საერთაშორისო მართლმსაჯულებას მიმართავენ.

"ჩვენთვის პრინციპულად მნიშვნელოვანია BBC-ის მიერ გავრცელებული ცრუ ინფორმაცია უპასუხოდ არ დარჩეს, ამიტომ, როგორც ცნობილია, გამოძიების წარმოებასთან ერთად ვგეგმავთ, მივმართოთ როგორც ბრიტანეთის კომუნიკაციების მარეგულირებელ კომისიას, ისე საჭიროების შემთხვევაში საერთაშორისო მართლმსაჯულებას, რათა BBC-მ სათანადოდ აგოს პასუხი და უარყოს სპეცსამსახურების ხელით გავრცელებული ცრუ ინფორმაცია," — თქვა კობახიძემ.

კობახიძის განცხადებით "კამიტის" საქმის გამოძიებაში ნაციონალური მოძრაობის ყოფილ შინაგან საქმეთა მინისტრიც, ვანო მერაბიშვილიც ფიგურირებს და გაარკევენ შეიძინა, თუ არა უწყებამ ადრე ეს ნივთიერება.

ცნობისთვის, 1-ელ დეკემბერს ქართული ოცნებამ განაცხადა, რომ "ცრუ ინფორმაციის გავრცელებისთვის" BBC-ს წინააღმდეგ სამართლებრივ დავას დაიწყებს. ოცნება გავრცელებული ინფორმაციის სიცრუეს ასევე ხსნის იმით, რომ პუბლიკაციაში "ძირითადად საუბრობენ დაინტერესებული პირები" — ეკა გიგაური, გელა ხასაია, და 4 ოქტომბრის საქმეზე დაკავებული ექიმი გიორგი ჩახუნაშვილის შვილი, კონსტანტინე ჩახუნაშვილი.

შეგახსენებთ, BBC-ის ინფორმაციით, "ქართულმა ოცნებამ” 2024 წლის აქციებზე დემონსტრანტების დასაშლელად I მსოფლიო ომის დროინდელი ტოქსიკური ნაერთი "კამიტე" გამოიყენა.

ოცნების ხელისუფლების შინაგან საქმეთა სამინისტროს მინისტრმა, გეკა გელაძემ უარყო BBC-ს გამოძიების შედეგები და მისი განცხადებით საქართველოში უწყებას ნივთიერება "კამიტი" არასდროს არ შეუსყიდია.

შემდეგ ჟურნალისტებმა გელაძეს გომელაურის გუშინდელი კომენტარი შეახსენეს, სადაც ამბობს, რომ "ნივთიერებები, რაზეც BBC საუბრობს შსს-ს შეძენილი ჰქონდა და იყენებდა მას, ოღონდ 2012 წლამდე".

სუს-მა BBC-ის ჟურნალისტურ გამოძიებასთან დაკავშირებით გამოძიება დაიწყო. უწყების ინფორმაციით გამოძიება სამსახურებრივი უფლებამოსილების გადამეტებას და უცხოეთის ორგანიზაციისთვის მტრულ საქმიანობაში დახმარების მუხლებით დაიწყო.