უნგრეთში 2-დღიან ვიზიტზე საუბრისას კახა კალაძემ კიდევ ერთხელ გადაუხადა მადლობა უნგრეთს და ვიქტორ ორმანს მხარდაჭერისთვის. მისი თქმით, უნგრეთის საგარეო საქმეთა მინისტრმა, პიტერ სიიარტომ გადმოგვცა ვიქტორ ორბანის მხარდაჭერა ჩვენი ქვეყნის სუვერენიტეტისა და ქართველი ხალხის მიმართ.

"დელეგაციის წევრებთან ერთად, ორი დღის განმავლობაში ოფიციალური ვიზიტით ვიმყოფებოდი უნგრეთის დედაქალაქ ბუდაპეშტში, სადაც არაერთი საინტერესო შეხვედრა გაიმართა. პირველ რიგში, უნდა აღვნიშნო ქვეყნის საგარეო საქმეთა მინისტრ პიტერ სიიარტოსთან გამართული შეხვედრა, სადაც საუბარი შეეხო ორ ქვეყანას შორის არსებულ მეგობრულ ურთიერთობებს და მათი გაღრმავების პერსპექტივებს. მიმოვიხილეთ რეგიონში მიმდინარე მოვლენები და რუსეთ-უკრაინის ომით გამოწვეული მძიმე ვითარებაც. გარდა ამისა, განსაკუთრებული ყურადღება დაეთმო ფსევდოლიბერალურ იდეოლოგიას, რომელიც თავსმოხვეულია და სერიოზული გამოწვევაა მსოფლიოსთვის. უნგრეთის საგარეო საქმეთა მინისტრმა კიდევ ერთხელ გამოხატა სრული მხარდაჭერა და თანადგომა, ასევე, გადმოგვცა ქვეყნის პრემიერ-მინისტრის, ვიქტორ ორბანის მხარდაჭერა ჩვენი ქვეყნის სუვერენიტეტისა და ქართველი ხალხის მიმართ.

...მინდა, კიდევ ერთხელ ვისარგებლო შემთხვევით და უნგრეთს, მის ხელისუფლებას, პრემიერმინისტრს მადლობა გადავუხადო ქართველი ხალხის, ჩვენი სახელმწიფოს ურყევი მხარდაჭერისა და თანადგომისთვის. გვიხარია, რომ როგორც საქართველო, ისე უნგრეთი, იბრძვის სიმართლისთვის. ეს დღევანდელ ვითარებაში ძალიან მნიშვნელოვანია", — განაცხადა კახა კალაძემ.