თბილისის მერმა, კახა კალაძემ ბუდაპეშტში საერთაშორისო კონფერენციაზე სიტყვით გამოსვლისას მადლობა გადაუხადა ვიქტორ ორბანს ბოლოდროინდელ პროცესებში საქართველოს მხარდაჭერისთვის.

"როდესაც დღევანდელ კონფერენციაზე მიწევს საუბარი თბილისის, როგორც ევროპული ქალაქის ხვალინდელ დღეზე, მინდა, პირველ რიგში ხაზი გავუსვა იმ ფაქტს, რომ ევროპული ღირებულება არის არა ომი, უსამართლობა და პოლიტიკური შანტაჟი, არამედ ღირსება, სამართლიანობა, კანონის უზენაესობა, საკუთარი და სხვისი კულტურის პატივისცემა, მშვიდობისთვის ბრძოლა და განვითარებისკენ სწრაფვა.

სწორედ ასეთ გარემოში უნდა შევქმნათ ჩვენი ქალაქების განვითარების სტრატეგია და ვიზრუნოთ საერთო მომავალზე.

მინდა, განსაკუთრებული მადლობა გადავუხადო უნგრეთს საქართველოს მხარდაჭერისთვის, განსაკუთრებით ბოლოდროინდელ პროცესებში. მადლობა უნგრეთის პრემიერმინისტრს, ბატონ ვიქტორ ორბანს სიმართლისთვის, რომელზეც მუდმივად საუბრობს", — აღნიშნა კალაძემ.

კახა კალაძე ბუდაპეშტში, დელეგაციასთან ერთად, 1-2 დეკემბერს იქნება.