საქართველოს პროკურატურამ დიდი ოდენობით ქონების წინასწარი შეთანხმებით ჯგუფურად მითვისების ფაქტზე ორ პირს ბრალდება წარუდგინა.

უწყების ინფორმაციით, ბრალდებულებს ნიდერლანდების მოქალაქის კუთვნილი პირუტყვის მოვლა ევალებოდათ, მათ კი 298 170 ლარის ღირებულების 194 სული პირუტყვი უკანონოდ გაასხვისეს და მიღებულ თანხას მართლსაწინააღმდეგოდ დაეუფლნენ. მათთვის წაყენებული ბრალი 7-დან 12 წლამდე თავისუფლების აღკვეთას ითვალისწინებს.

"სამცხე-ჯავახეთის საოლქო პროკურატურის მიერ ჩატარებული გამოძიებით დადგინდა, რომ ბრალდებულებმა, რომლებსაც ნიდერლანდების მოქალაქის კუთვნილი მსხვილფეხა რქოსანი პირუტყვის მოვლა-პატრონობა ევალებოდათ, 298 170 ლარის ღირებულების 194 სული პირუტყვი უკანონოდ გაასხვისეს, ხოლო რეალიზაციიდან მიღებულ თანხას მართლსაწინააღმდეგოდ დაეუფლნენ.

ბრალდებულებს, მათ შორის ერთ-ერთს დაუსწრებლად, ბრალდება სისხლის სამართლის კოდექსის 182-ე მუხლის მეორე ნაწილის "ა" და მესამე ნაწილის "ბ" ქვეპუნქტებით (მითვისება, ჩადენილი წინასწარი შეთანხმებით ჯგუფურად და დიდი ოდენობით) წარედგინათ, რაც სასჯელის სახედ და ზომად შვიდიდან თერთმეტ წლამდე თავისუფლების აღკვეთას ითვალისწინებს", — წერია უწყების მიერ გავრცელებულ განცხადებაში.

პროკურატურის განმარტებით, უწყება ბრალდებულებისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.