შვედ გარემოსდამცველ აქტივისტს, გრეტა თუნბერგს, ვენეციაში შესვლა დროებით აეკრძალა. თუნბერგი ქალაქიდან მას შემდეგ გააძევეს, რაც ეკოაქტივისტებმა დიდი არხი პროტესტის ნიშნად მწვანედ შეღებეს.

ჯგუფმა Extinction Rebellion მდინარეები და შადრევნები გარემოსთვის არასაზიანო საშუალებით მწვანედ შეღება იტალიის სხვა ქალაქებშიც, მათ შორის, მილანში, პალერმოსა და ბოლონიაში. წითელ მოსასხამებში გამოწყობილმა აქტივისტებმა ვენეციის არხის ხიდზე ბანერიც გადმოფინეს წარწერით "შეწყვიტეთ ეკოციდი". მათი თქმით, ამ საპროტესტო ნაბიჯის მიზანი "კლიმატის კრიზისის მასშტაბური შედეგების" საზოგადოებისთვის შეხსენება იყო და თემატურად ეძღვნებოდა კლიმატის ცვლილების საერთაშორისო კონფერენციას, რომელიც გაეროს ორგანიზებით გაიმართა ბრაზილიაში. Extinction Rebellion-მა მწვავედ გააკრიტიკა იტალიის მთავრობა, რომელიც კონფერენციაზე შემუშავებული ზომების მიღებას ეწინააღმდეგება.

ფოტო: Reuters

რაც შეეხება თუნბერგს, მას არხების ქალაქში შესვლა 48 საათით აეკრძალა. ადგილობრივი მედიის ცნობით, იგი ათობით სხვა აქტივისტთან ერთად დაჯარიმდა კიდეც $172-ით. თუნბერგი, რომელმაც ღაზის სექტორის საზღვაო ბლოკადის გარღვევა ორჯერ სცადა, წინა თვეში ისრაელმა ისევ დააკავა და შვედეთში დააბრუნა.

ფოტო: Extinction Rebellion / Shutterstock

ვენეტოს რეგიონის გუბერნატორმა, ლუკა ძაიამ, ვენეციაში აქტივისტების ქმედება დაგმო და მას ისტორიული ქალაქისთვის დამაზიანებელი უწოდა.

"ვანდალიზმით გარემოს ვერ დაიცავ", — დაწერა ძაიამ სოციალურ ქსელში, — "ასეთი ქმედებები აზიანებს ვენეციას, საჭიროებს აღდგენით სამუშაოებს და, რაც უნდა პარადოქსული აღმოჩნდეს, მეტად აბინძურებს გარემოს".

ვენეციის მწვანედ შეღებილი არხი

ფოტო: Reuters

გარემოსდამცველი აქტივისტების საპროტესტო ქმედებები ბოლო წლებში არაერთხელ შეფასებულა ვანდალიზმად. 2022 წლის ზაფხულში ხელოვნების ცნობილ ნიმუშებს — მათ შორის, ვან გოგის მზესუმზირებს ლონდონში და მონეს ტილოს გერმანიაში — რამდენჯერმე შეასხეს კონსერვირებული საკვები. აქტივისტებმა ნიდერლანდებში ხელებიც მიიწებეს იან ვერმეერის ცნობილ ნახატზე, გოგო მარგალიტის საყურით. მსგავსი შემთხვევები სხვადასხვა ქვეყნის მუზეუმებსა და გალერეებში მოგვიანებითაც განმეორდა.