21 წლის ლუკა ძაძამიამ საკრებულო დატოვა. განცხადებას, სადაც ძაძამია წერს, რომ საკუთარი სურვილით ტოვებს თბილისის საკრებულოს, 20 ნოემბერს "ტვ პირველმა" გაავრცელა. ის წერილში აღნიშნავს, რომ საკრებულოდან სხვა სამსახურში საქმიანობის გაგრძელების მიზნით მიდის.

კახა კალაძემ ჟურნალისტებთან განაცხადა, რომ ეს ძაძამიას პირადი გადაწყვეტილება იყო, რადგან მან საზოგადოებისგან ზეწოლას ვერ გაუძლოს და მუშაობას კერძო სექტორში გააგრძელებს.

"ეს მისი პირადი გადაწყვეტილებაა. ამ ახალგაზრდა ადამიანმა უამრავი შეურაცხყოფა მიიღო ბოლო თვეებში. ის აპირებს, მუშაობა კერძო სექტორში განაგრძოს. ის „ქართული ოცნების“ მხარდამჭერია. გუშინ გვქონდა საუბარი. დარწმუნებული ვარ, თავად გააკეთებს განმარტებას.
ლუკა ძაძამია არის ახალგაზრდა ადამიანი. ყველას გვეშლება ცხოვრებაში, შეუცდომელი არავინაა, მითუმეტეს როცა ხარ ახალგაზრდა. მან გააკეთა განმარტებები ამასთან დაკავშირებით, რომ დაუშვა შეცდომა. ყველას მოგვდის, შეუცდომელი არავინაა. შესაბამისად ახსნა-განმარტებები გაკეთებული იყო მის ქმედებებთან დაკავშირებით, მის აწმყოსთან დაკავშირებით, მომავალთან დაკავშირებით თვითონ გააკეთებს," — თქვა კალაძემ.

კითხვაზე იყო, თუ არა ზეწოლა ქართული ოცნების მხარდამჭერებისგან დაეტოვებინა პროევროპულ აქციებში მონაწილე ახალგაზრდას საკრებულო, კალაძემ ჟურნალისტებს უპასუხა, რომ "გაუბედურებულები და გაფარჩაკებულები" არიან და ეს მათი საქმე არ არის.

"არანაირი პრეტენზია არ ყოფილია ოცნების მხარდამჭერებისგან. თქვენ მიხედეთ საკუთარ თავს, ხომ ხედავთ რას გავხართ — გაუბედურებულები და გაფარჩაკებულები ხართ, ნუ ინერვიულებთ ოცნების მხარდამჭერებზე. მერწმუნეთ უფრო მეტი გაქვთ სანერვიულო. იმ მდგომარეობაში ხართ ძალიან ბევრი გაქვთ საფიქრალი და სანერვიულო. როგორ მოხვდა სიაში ლუკა ძაძამია არ არის თქვენი საქმე, თქვენ ვინ გეკითხებათ. თქვენ ვინ გეკითხებათ ჩვენ როგორ ვაკეთებთ არჩევანს?" — თქვა კალაძემ.

შეგახსენებთ, ლუკა ძაძამია 2023-2024 წლებში საპროტესტო აქციების მონაწილე იყო, შემდეგ კი ქართლი ოცნების სიაში მოხვდა. 30 ოქტომბერს, ლუკა ძაძამიამ ჟურნალისტებთან განაცხადა, რომ "პოლიტიკა არ არის სტატიკური მოცემულობა, ეს არის დინამიკა, არის მუდმივი ცვლილებები". მისივე თქმით, "საპროტესტო აქციების მსვლელობებმა თავადვე გამოაჩინა რადიკალური მიზნები".