ოცნების პრემიერმა ირაკლი კობახიძემ აჭარის საზოგადოებრივი მაუწყებლის ეთერში განაცხადა, რომ ემიგრანტების ნახევარი რუსეთის ფედერაციაში ცხოვრობს, სადაც 2008 წლიდან შეზღუდული აქვთ არჩევნებში მონაწილეობა და ამის გამო აქამდე "წუხილი" არავის გამოუთქვამს იმიტომ, რომ ოპონენტების "მსჯელობა მთლიანად სუბიექტურია და არ ეფუძნება რეალურ არგუმენტებს". ის კითხვას სვამს: "შეიძლება, ნახევარს ჰქონდეს სხვა პრივილეგია და მეორე ნახევარს ჰქონდეს სხვა პრივილეგია?"

"ჩვენი ემიგრანტების დაახლოებით ნახევარი ცხოვრობს რუსეთის ფედერაციაში და რუსეთს ფედერაციაშია არასდროს არ იხსნებოდა 2008 წლიდან მოყოლებული საარჩევნო უბნები. თქვენ გახსენდებათ რომელიმე მათგანის წუხილი იმასთან დაკავშირებით, რომ ჩვენი ემიგრანტების ნახევარი მოკლებული იყო საარჩევნო ხმის უფლებას, ან თანასწორობის პრინციპი რომ ირღვეოდა? შეიძლება, ნახევარს ჰქონდეს სხვა პრივილეგია და მეორე ნახევარს ჰქონდეს სხვა პრივილეგია? ეს წუხილი ხომ არავისგან მოგისმენიათ? რატომ? იმიტომ, რომ მთლიანად სუბიექტურია მათი მსჯელობა და არ ეფუძნება რეალურ არგუმენტებს.

სადაც არ უნდა ცხოვრობდეს ადამიანი, ნებისმიერ ქვეყანაში, შეიძლება სულ არ იყოს გახსნილი ჩვენი დიპლომატიური წარმომადგენლობა, ასეთი ბევრი ქვეყანაა, ყველას უნდა ჰქონდეს თანაბარი პირობები და ძალიან მნიშვნელოვანია ინფორმირებული არჩევანის გაკეთება. ამისთვის მნიშვნელოვანია ქვეყანაში ჩამოსვლა თუნდაც ერთი დღით, საკუთარი თვალით იმის ხილვა, რა ხდება ქვეყანაში და ამის საფუძველზე ინფორმირებული არჩევანის გაკეთება", — განაცხადა ირაკლი კობახიძემ აჭარის საზოგადოებრივი მაუწყებლის ეთერში.