"მისი საქმიანობა დიპლომატიას სცდება, ის ჩვეულებრივი "აკაცუკია", — ამის შესახებ თბილისის მერმა მედიასთან საქართველოში გერმანიის ელჩის საპროტესტო აქციაზე მისვლის ფაქტის შეფასებისას ისაუბრა.

კახა კალაძე ამბობს, რომ საერთოდ არ აინტერესებს სად გაიწვიეს და დააბრუნეს პეტერ ფიშერი.

"ახალი არაფერი ხდება. ჩვენ ვიცით "დიფ სთეითს" საქართველოში თავიანთი წარმომადგენლები ჰყავს. ისინი უშუალოდ ხელმძღვანელობენ ძალადობრივ ჯგუფებს და სრულ კოორდინაციაში არიან მათთან, თუ როგორ უნდა იმოქმედონ. ძალიან სამწუხაროა, როდესაც ელჩი ამ ტიპის ქმედებებით არის დაკავებული. რა თქმა უნდა, ეს ყველანაირ დიპლომატიურ საქმიანობას სცდება. ის ჩვეულებრივი "აკაცუკია". მეტს ვერაფერს ვუწოდებ.

რაც შეეხება ფიშერის საკონსულტაციოდ გაწვევის და შემდეგ დაბრუნების ფაქტს, გულწრფელად გეტყვით, საერთოდ არ მაინტერესებს სად გაიწვიეს და დააბრუნეს. აქ მთავარი საკითხი არის ის, რომ დიპლომატი, ნაცვლად იმისა, რომ დიპლომატიურ საქმიანობას ეწეოდეს, ამის გარდა ყველაფერს აკეთებს. ეს ძალიან მძიმეა. როგორ წარმოგიდგენიათ, რომ ნებისმიერ განვითარებულ ქვეყანაში უცხო ქვეყნის ელჩი დაკავებული იყოს ძალადობრივი ჯგუფების წახალისებით და პირდაპირ მითითებების მიცემით", — განაცხადა თბილისის მერმა.

გერმანიამ ელჩი პეტერ ფიშერი საქართველოდან კონსულტაციებისთვის 19 ოქტომბერს გაიწვია და 6 ნოემბერს დააბრუნა. მათი განმარტებით, მათი ამ გადაწყვეტილების მიზეზი საქართველოს ხელისუფლების მიერ ევროკავშირის, გერმანიის და პირადად ელჩის წინააღმდეგ გაკეთებული განცხადებებია.