ჟურნალისტმა ოცნების პარლამენტის თავმჯდომარეს, შალვა პაპუაშვილს კითხვა დაუსვა, თუ "როგორ უნდა შეხედოს ქართულმა საზოგადოებამ გუშინ გერმანიის ელჩის საპროტესტო აქციაზე მისვლას". პაპუაშვილის შეფასებით პეტერ ფიშერმა ამ ქმედებით "მასხრად აიგდო ქართულ სახელმწიფო, ქართულ საზოგადოება და რაც კი დაკავშირებულია დიპლომატიასთან". შემდეგ პაპუაშვილმა დასძინა, რომ გერმანიის ელჩმა "ქართული ეკლესიის შეურაცხმყოფელთან" გადაიღო ფოტო და მან ამითაც მიაყენა ქართველ ხალხს შეურაცხყოფა.

"საზოგადოებამ კი არა, მე როგორ შევხედო, ის ვეღარ გამიგია. აბსოლუტურად აღმაშფოთებელია, ეს ადამიანი მასხრად იგდებს ქართულ სახელმწიფოს, მასხრად იგდებს ქართულ საზოგადოებას, მასხრად იგდებს ყველაფერს, რაც კი დაკავშირებულია დიპლომატიასთან. და გასაკვირია მართლა, ჩვენ რაც ვნახეთ — ერთი — მას არ დაუგმია 4 ოქტომბრის შტურმი პრეზიდენტის სასახლეზე. გუშინ მივიდა და მხარდაჭერა გამოუცხადა ექსტრემისტებს, რომლებიც 4 ოქტომბრის შტურმის მონაწილეები იყვნენ. მეორე — ის პოზირებდა და ადამიანმა, ვინც ფოტო დადო, ისიც შემთხვევით გავიგეთ ერთ-ერთი აქციის მონაწილის ექსტრემისტის ფოტოსგან.

ის ვისთანაც პოზირებს [ფოტოში] ეს ადამიანი ლანძღავდა ქართულ ეკლესიას, საქართველოს პატრიარქს ეგზარქოსებად მოიხსენიებს, ამ ადამიანთან დადგა გერმანიის ელჩი, გადაიღო ფოტო და სოლიდარობა გამოუცხადა. ეს მე მაგონებს მიხაილ როთის ხაზს, ის ჩამოსული იყო აქ და თქვა, რომ რა გინდათო? ბედნიერებას გინდათ მიაღწიოთ ეკლესიასთან ერთადო? აი ეს არის ზუსტად თავდასხმა ქართულ ეკლესიაზე, მიხაილ როთის ხაზი, რომელსაც დღეს გერმანიის ელჩი აგრძელებს," — თქვა პაპუაშვილმა.

ჟურნალისტის გაჟღერებულ მოსაზრებაზე, რომ შეიძლება გერმანიის ელჩმა არ იცოდა მამუკა ცუცქირიძის პოზიციაზე ეკლესიასთან დაკავშირებით, პაპუაშვილმა უპასუხა — "უფრო უარესი თუ არ იცოდა ვინ იყო".

პაპუაშვილმა ასევე განაცხადა, რომ ის აღნიშნულ ფაქტთან დაკავშირებით, გერმანიის საგარეო საქმეთა სამინისტროსგან რეაგირებას ელოდება. ოცნების ლიდერის განმარტებით, ოცნებას "იმედი ჰქონდა გერმანიის ელჩი ვენის კონვენციის მუხლებს გადაიკითხავდა" და "თავს შეიკავებდა".

"ახლა მე პირადად ველოდები, რა ნაბიჯებს გადადგამს გერმანიის საგარეო საქმეთა სამინისტრო, რადგან, ეს ადამიანი, ფაქტია, რომ მასხრად იგდებს ქართულ სახელმწიფოს და ქართულ საზოგადოებას. კონსულტაციიდან დაბრუნების შემდეგ გვქონდა იმედი, რომ გერმანიის ელჩი გააცნობიერებდა ვენის კონვენციის მნიშვნელობას, გადაიკითხავდა კიდევ ერთხელ შესაბამის მუხლებს და ამ ყველაფრის შემდეგ თავს მაინც შეიკავებდა. არ გასულა რამდენიმე დღე და უკვე მასხრად აგვიგდო მთელი საზოგადოება.

როდესაც გერმანიის საგარეო საქმეთა სამინისტრო აბრუნებდა ელჩ ფიშერს, მათ ჰქონდათ წინასწარი კონსულტაცია საქართველოს საგარეო საქმეთა სამინისტროსთან. მათ განუცხადეს საგარეოს და დაჰპირდნენ, რომ გერმანიის ელჩი თავს შეიკავებდა იმგვარი ქმედებებისგან, რომლებსაც მანამდე ჰქონდა ადგილი" " — ამბობს შალვა პაპუაშვილი.

შემდეგ ოცნების ლიდერმა გერმანიის საგარეო საქმეთა სამინისტროს მოუწოდა "ჩამოყალიბდეს ქართველ ხალხთან ხიდების გადება უნდათ, თუ ამ ხიდების დაწვა საბოლოოდ, რადგან ამ ელჩის პირობებში, რომელიც მასხრად იგდებს [ქართველ ხალხს] — რთულია წარმოიდგინო რომ ეს ხიდები იქნება გადებული".

გუშინ, მამუკა ცუცქირიძემ სოციალურ ქსელში გერმანიის ელჩთან საქართველოში, პეტერ ფიშერთან ერთად ფოტო გამოაქვეყნა, სადაც წერს, რომ ფიშერმა სოლიდარობა გამოუცხადა მას და აქციის მონაწილეებს.