რუსეთ-უკრაინის ომში მებრძოლ გურამ ბერუაშვილს, რომელიც კურსკის ოლქში იბრძოდა, დაუსწრებლად მიესაჯა 28 წლით თავისუფლების აღკვეთა, ამის შესახებ მოსკოვის პროკურატურის ტელეგრამის არხი იუწყება.

"სახელმწიფო ბრალმდებლის, მოსკოვის პროკურატურის გადაწყვეტილებით, 48 წლის ქართველ დაქირავებულ გურამ ბერუაშვილს დაუსწრებლად მიესაჯა 28 წლით თავისუფლების აღკვეთა, პირველი რვა წელი ციხეში დანარჩენი დრო მკაცრი რეჟიმის კოლონიაში უნდა მოიხადოს", — ნათქვამია გავრცელებულ განცხადებაში.

ის დამნაშავედ ცნეს შეიარაღებულ კონფლიქტში დაქირავებულის რანგში მონაწილეობის, რუსეთის სახელმწიფო საზღვრის უკანონოდ გადაკვეთის, ცეცხლსასროლი იარაღისა და საბრძოლო მასალის კონტრაბანდის, ტერორისტული აქტის ჩადენის, ასევე ცეცხლსასროლი იარაღის, მისი ძირითადი ნაწილებისა და საბრძოლო მასალის უკანონოდ გადატანის, ტარებისა და შენახვის ბრალდებებში.

რუსული მედია წერს, რომ "2022 წელს ბერუაშვილი უკრაინაში ჩავიდა საერთაშორისო ლეგიონის განლაგების პუნქტში, სადაც სარგებლის მიზნით შეუერთდა შეიარაღებულ ძალებს. 2024 წლის აგვისტოში, კალაშნიკოვის ავტომატითა და საბრძოლო მასალით ხელში, ის შევიდა კურსკის რეგიონში, სადაც შეიარაღებული წინააღმდეგობა გაუწია რუსეთის შეიარაღებული ძალების პირადი შემადგენლობის კანონიერ საქმიანობას".