ბიძინა ივანიშვილი 2025 წლის "პრესის მტაცებელთა" სიაში მოხვდა. სიას ორგანიზაცია "რეპორტიორები საზღვრების გარეშე" (RSF) ავრცელებს.

სიაში ას მოხვდნენ ისრაელის თავდაცვის ძალები, ჩინეთის კომუნისტური პარტია, ილონ მასკი და სხვები — ყველა მათგანი ჟურნალისტების შევიწროების ან მედიის საქმიანობაში ხელის შეშლისთვის.

"ისინი კლავენ, ცენზურას უწესებენ, აპატიმრებენ და ესხმიან თავს ჟურნალისტებს, ახშობენ მედიას, აყალბებენ ჟურნალისტიკას ან მის პრინციპებს იყენებენ ინფორმაციის მანიპულირებისა და პროპაგანდის გასავრცელებლად. 2025 წელსაც მედიის პროფესიონალები სულ უფრო მრავალფეროვანი მტრული მეთოდების სამიზნეები გახდნენ.

მათ შორის არიან ისინიც, ვინც წლების განმავლობაში არაერთხელ დევნიდნენ მედიას — ჩინეთის კომუნისტური პარტია სი ძინპინის ხელმძღვანელობით, საუდის არაბეთის მუჰამედ ბინ სალმანი, ვლადიმირ პუტინი და ალექსანდრ ლუკაშენკო. ყველა მათგანმა 2025 წელს კვლავაც გამოიჩინა თავი ჟურნალისტების დაუნდობელი დევნითა და შევიწროებით.

ისრაელის თავდაცვის ძალები (IDF), რომლებიც პასუხისმგებელნი არიან თითქმის 220 ჟურნალისტის სიკვდილზე პრემიერმინისტრ ბენიამინ ნეთანიაჰუს მმართველობის პერიოდში, ბუნებრივია, ამ სიაშიც მოხვდნენ. ჟურნალისტების დუმილში არანაკლებ ოსტატურები არიან მიანმარის სახელმწიფო მშვიდობისა და უსაფრთხოების კომისია და ბურკინა ფასოს სამხედრო ხუნტა, კაპიტანი იბრაჰიმ ტრაორეს ხელმძღვანელობით. მექსიკაში კი ხალისკოს ახალი თაობის კარტელი (CJNG) 2025 წელს ქვეყნის ყველაზე ძალადობრივ კრიმინალურ ორგანიზაციად და ჟურნალისტიკის ერთ-ერთ ყველაზე საშიშ მტრად იქცა.

რადგან ისინი ახშობენ მედიას ან ჟურნალისტებს თვითნებურ სამართლებრივ ზეწოლას უწყობენ, ამ სიაში მოხვდნენ აშშ-ის ფედერალური საკომუნიკაციო კომისიის (FCC) ხელმძღვანელი ბრენდან კარი, კამბოჯის პროკურორის მოადგილე სენგ ჰეანგი და ქართველი მილიარდერი ოლიგარქი და ყოფილი პრემიერმინისტრი ბიძინა ივანიშვილი.

2025 წელს პრესის თავისუფლების მტრები ასევე გამოირჩევიან ტექნოლოგიების სულ უფრო ფართო გამოყენებით, რომელიც მიზნად ისახავს ინფორმაციის გავრცელების თავისუფლების შეზღუდვას. სი ძინპინი ჩინურ ჩატბოტებს იყენებს სახელმწიფო პროპაგანდის გასავრცელებლად, ილონ მასკი კი საკუთარ სოციალურ ქსელ X-ს ჟურნალისტების შევიწროებისთვის იყენებს. ისრაელის თავდაცვის ძალები, რომლებიც უკვე ასობით ჟურნალისტის სიკვდილზე არიან პასუხისმგებელნი, ონლაინ კამპანიებს ატარებენ ჟურნალისტიკის დისკრედიტაციის მიზნით. რაც შეეხება OpIndia-ს, ჰინდუ ნაციონალისტურმა ვებგვერდმა 2025 წელს კიდევ უფრო გააძლიერა დეზინფორმაციისა და შევიწროების კამპანიები ინდოეთის მთავრობის კრიტიკოსი ჟურნალისტების წინააღმდეგ", — წერია განცხადებაში.

ბიძინა ივანიშვილთან ერთად სიაში ასევე არიან ჰაიბატულა ახუნძადა (ავღანეთი), ვლადიმირ პუტინი (რუსეთი), დანიელ ორტეგა (ნიკარაგუა), ალექსანდრ ლუკაშენკო (ბელარუსი), ილჰამ ალიევი (აზერბაიჯანი), ალი ხამენეი (ირანი), ნიკოლას მადურო (ვენესუელა), ვიქტორ ორბანი (უნგრეთი), ისრაელის თავდაცვის ძალები, ჩინეთის კომუნისტური პარტია, ალექსანდარ ვუჩიჩი (სერბეთი), ბურკინა-ფასოს სამხედრო ხუნტა, რეჯეფ თაიფ ერდოღანი (თურქეთი), მარგარიტა სიმონიანი (რუსეთი), ილონ მასკი (აშშ), ხავიერ მილეი (არგენტინა), რობერტ ფიცო (სლოვაკეთი) და სხვები.