ქართული ოცნების პარლამენტის თავმჯდომარის, შალვა პაპუაშვილის განცხადებით, "ტერორისტთან მიმოწერა, არანაირი ყოფითი, ყოველდღიური დიპლომატიური საქმიანობა არ არის". თავმჯდომარემ ასევე დასძინა, რომ ჰელჩინსკის მიწერილი წერილის შინაარსიც "სკანდალურია", რადგან ამით ევროკავშირი "აქციებზე ძალადობის გამო მსჯავრდებული ადამიანების გათავისუფლებას ითხოვს".

"უბრალოდ გამაოგნებელია, როდესაც ევროკავშირის საელჩო ტერორისტს წერს წერილს. ამას ვენის კონვენცია სჭირდება თუ უბრალოდ, ადამიანობა სჭირდება, რომ ტერორისტთან არ იყო სალონურ მიმოწერაში?! გუშინ ჩვენ მოვისმინეთ აბსოლუტურად სამარცხვინო განმარტება, რომ თითქოს, ეს ჩვეულებრივი დიპლომატიური პრაქტიკაა, რომ ფოსტა მისდით საქართველოს მოქალაქეებიდან და საელჩოს თანამშრომლები სხედან და მათ პასუხებს სწერენ მიმდინარე საინტერესო, აქტუალურ საკითხებზე. მართლა შტერები ვგონივართ, მე მგონი, ამათ ქართველები. კიდევ ერთხელ, ტერორისტთან მიმოწერა, არანაირი ყოფითი, ყოველდღიური დიპლომატიური საქმიანობა არ არის. თვითონ ფაქტი არის სკანდალი, მაგრამ მეორე არის კიდევ წერილის შინაარსი. აქციებზე ძალადობის გამო მსჯავრდებული ადამიანების გათავისუფლებას ითხოვენ და ჩვენ გვეუბნებიან რომ ეს არ არის მხარდაჭერა?! ვის ატყუებენ?!" — განაცხადა პაპუაშვილმა.

გუშინ, შალვა პაპუაშვილმა სოციალურ ქსელში გაავრცელა განცხადება, სადაც საუბარი აქვს ევროკავშირის ელჩზე საქართველოში, პაველ ჰელჩინსკიზე, რომელმაც წერილი მიწერა ციხეში მყოფ ზვიად ცეცხლაძეს.

შეგახსენებთ, პროევროპულ აქციებში მონაწილეობისთვის დაკავებულ ზვიად ცეცხლაძეს ბრალად ედება ჯგუფური ძალადობის ორგანიზება და სასამართლომ მას 2 წლითა და 6 თვით პატიმრობა მიუსაჯა.