ქართული ოცნების კომუნიკაციების სამსახურის ხელმძღვანელმა, გიორგი გრძელიშვილმა ბრიფინგზე განაცხადა, რომ მზია ამაღლობელისთვის გადაცემული მსოფლიოს პრესის თავისუფლების გმირი ჯილდო "დაფასებაა დავალების შესრულებისთვის". მისივე თქმით, ამაღლობელისთვის ჯილდოს გადაცემა აჩვენებს, თუ "რა მძიმე მდგომარეობაშია საერთაშორისო მედია, საერთაშორისო პრესა", რომელიც "ბრიუსელისგან იმართება".

"გუშინ ცნობილი გახდა, რომ მზია ამაღლობელი, რომელიც მსჯავრდებულია ძალადობის ფაქტზე საზოგადოებრივი წესრიგის დამცველის მიმართ და მისჯილი აქვს 2 წლით თავისუფლების აღკვეთა, საერთაშორისო პრესის ინსტიტუტისა და საერთაშორისო მედიის მხარდაჭერის პარტნიორობით დაწესებული მსოფლიო პრესის თავისუფლების გმირის ჯილდოს მფლობელი გახდა. ამაღლობელისთვის გმირის ჯილდოს გადაცემა არის ერთგვარი გაგრძელება იმ უსამართლო პოლიტიკური დამოკიდებულების ჩვენი ქვეყნის მიმართ, რაც რამდენიმე წელია გაუჩერებლად გრძელდება. გადაწყვეტილება, რომ გმირის ჯილდო გადასცენ დამნაშავეს, რომელიც მიზანმიმართულად თავს დაესხა პოლიციელს და ამ ქმედებით სილა გააწნა არა ერთ კონკრეტულ სამართალდამცავს, არამედ მთელ სისტემას და სახელმწიფოს, წარმოადგენს მორიგ უტიფრობას, დაცინვას ქართული საზოგადოების, თავისუფალი სიტყვის და თავისუფალი მედიის მიმართ.

მეორე მხრივ, მსჯავრდებული მზია ამაღლობელისთვის გმირის ჯილდოს გადაცემა მკაფიოდ აჩვენებს, თუ რა მძიმე მდგომარეობაშია საერთაშორისო მედია, საერთაშორისო პრესა, რომელიც ზუსტად ისე, როგორც ბრიუსელის პოლიტიკური ისტებლიშმენტი, ერთი ცენტრიდან იმართება, ერთი ხელით ტოტალურად კონტროლდება და ნებისმიერი მსგავსი გადაწყვეტილება კონკრეტულ მიზანს ემსახურება. ამ შემთხვევაში, მსჯავრდებული ამაღლობელი მიზანმიმართული ძალადობისთვის, სახელმწიფოსა და მის ინსტიტუციებზე თავდასხმისთვის გამოიყენეს, ხოლო, შედეგად ვხედავთ, რომ "დაუფასეს" დავალების პირნათლად შესრულება და საერთაშორისო ასპარეზზე არც მეტი, არც ნაკლები — გმირად გამოგვიცხადეს. სწორედ ეს არის "დიფ სტეიტის" ხელწერა — პოლიტიკაშიც და მედიაშიც მათთვის არსებობს მხოლოდ ერთი — გაუკუღმართებული სტანდარტი, როდესაც ხელისუფლების დამხობის ორგანიზატორებს მსხვერპლად აცხადებენ — კანონის აღმსრულებელ ხელისუფლებას კი მოძალადედ. როდესაც მოძალადე ჟურნალისტს გმირის ჯილდოს აძლევენ, ხოლო საკუთარი საქმის კეთილსინდისიერად შემსრულებელ ჟურნალისტებს "რუსული პროპაგანდის" გამხმოვანებლად მოიხსენიებენ ისე, რომ 1 ფაქტის წარმოდგენაც კი არ შეუძლიათ. [...]

კიდევ ერთხელ, ხაზგასმით უნდა აღინიშნოს, რომ ამაღლობელმა, ყოველგვარი ემოციებისგან დაცლილმა, მიზანმიმართულად, მისგან ფიზიკურად უკვე მოცილებული პოლიციელი ფიზიკური ძალის გამოყენებით მოაბრუნა და სახეში სილა გააწნა. ამაღლობელის პატრონებისთვის ეს იყო სილა, რომელიც იმ მომენტში გააწნეს სახელმწიფოს, რადგან ფეხქვეშ გაეთელათ სახელმწიფოს არსი. საპასუხოდ კი მიიღეს კანონის განუხრელად აღსრულება. ამაღლობელის გმირად გამოცხადება არ მხოლოდ მისი წახალისებაა, არამედ სიგნალია აგენტებისთვის, რომ გმირების რიგებში ჩაეწერება ყველა, ვინც განუხრელად შეასრულებს "დიპ სტეიტის" დავალებებს.

და ბოლოს, ჩვენი ქვეყანა და მისი მრავალსაუკუნოვანი ისტორია აღსავსეა ქართველი გმირების საქმეებით, რომლებმაც დღევანდელ დღემდე მოგვიტანეს ჩვენი სამშობლო. ვახტანგ გორგასალი, დავით აღმაშენებელი, თამარ მეფე, გიორგი ბრწყინვალე, შოთა რუსთაველი, ილია ჭავჭავაძე, მეფე ერეკლე... ასეთ გმირებს ვიცნობთ ჩვენ, ჩვენი საზოგადოება და ჩვენი ქვეყნის იდენტობა. პარალელურად, საქართველოს ჰყავს "დიპ სტეიტის" პირველი გმირი, რომელიც პოლიციელზე მოძალადე მზია ამაღლობელია," — განაცხადა ოცნების კომუნიკაციების ხელმძღვანელმა, გიორგი გრძელიშვილმა.

შეგახსენებთ, "ნეტგაზეთის" და "ბათუმელები" დამფუძნებელი და მედიამენეჯერი, მზია ამაღლობელი, ექვს სხვა ჟურნალისტთან ერთად, 2025 წლის მსოფლიო პრესის თავისუფლების გმირის ჯილდოს მფლობელი გახდა.

მზია ამაღლობელის სასამართლო პროცესებისას პროკურატურამ მრავალჯერ გააჟღერა ვერსია, რომ მზია ამაღლობელი უცნობი პირისგან ტელეფონით მითითებებს იღებდა და მან "დავალებით" გააწნა ირაკლი დგებუაძეს სილა.