საქართველოში ბოლო დროს განვითარებული არეულობა გარედან იყო პროვოცირებული იმისათვის, რომ მაიდნის სცენარის რეალიზებით ქვეყანა დასავლეთს დაემორჩილოს, — ამის შესახებ ბრიფინგზე რუსეთის საგარეო საქმეთა სამინისტროს ინფორმაციისა და პრესის დეპარტამენტის დირექტორმა, მარია ზახაროვამ განაცხადა.

პრესსპიკერმა გაიხსენა, რომ "რადიკალური ოპოზიციის ძალადობრივი ქმედებები", რომელსაც თან ახლდა პოგრომები, 4 ოქტომბერს ჩატარებულ მუნიციპალურ არჩევნებს დაემთხვა, რომელიც, უცხოელი დამკვირვებლების, მათ შორის დასავლური ქვეყნების წარმომადგენლების შეფასებით, "გამჭვირვალე და კონკურენტუნარიანი" იყო. "დასავლური მოთამაშეების ცნობილი ჯგუფის მიერ საქართველოს შიდა საქმეებში აშკარა ჩარევა სერიოზულ შეშფოთებას იწვევს".

"ოპოზიციის წარმომადგენლებმა, რომლებსაც მხარს უჭერს ევროკავშირი და კიევის რეჟიმი და რომლებიც დაკავშირებულია უკრაინის მოქალაქე მიხეილ სააკაშვილის ერთიან ნაციონალურ მოძრაობასთან, რომელიც საქართველოში პატიმრობაში იმყოფებოდა, გამოიყენეს ყველა ის ძველი სქემა, რომელიც აქტიურად იქნა მსოფლიოს სხვადასხვა კუთხეში და ღიად მოუწოდებდნენ კანონიერი მთავრობის დამხობისკენ".

"ამ საბოლოოდ წარუმატებელი პროვოკაციის აშკარა მიზანია საქართველოში მაიდნის სცენარის განხორციელება, იქ მარიონეტული მმართველობის დამყარება და რესპუბლიკის სრულად დასავლეთს დამორჩილება, რათა საქართველო ჩვენს წინააღმდეგ მორიგი ავანტიურისთვის გამოიყენონ და რუსეთის სამხრეთ საზღვრებზე სიტუაციის დესტაბილიზაცია მოახდინონ", — განაცხადა ზახაროვამ.

"მოკლედ, იდეა ერთია: საქართველო სხვების ხელში იარაღად აქციონ გეოპოლიტიკური დაპირისპირებისთვის. ამასობაში, ფერადი რევოლუციების, მაიდნებისა და გადატრიალებების ამ მცდელობების უკან მდგომი პირები სრულიად ცინიკურად უგულებელყოფენ ქართველი ხალხის ფუნდამენტურ ინტერესებს".

"ჩვენ კიდევ ერთხელ ვადასტურებთ ჩვენს თანმიმდევრულ ერთგულებას სამხრეთ კავკასიის ყველა ქვეყანასთან მშვიდობიანი, თანასწორი და ურთიერთსასარგებლო ურთიერთობების მიმართ და ვეწინააღმდეგებით იმას, რომ რეგიონი მწვავე დაპირისპირების კიდევ ერთ არენად იქცეს", — თქვა ზახაროვამ და რუსეთის ოფიციალური პოზიცია გააჟღერა.

4 ოქტომბრის თვითმმართველობის არჩევნებში მონაწილეობაზე უარი თქვა 8 ოპოზიციურმა პარტიამ, მათ შორის იმ 2-მა კოალიციამ — კოალიცია ცვლილებისთვის და ნაციონალური მოძრაობა, ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

თვითმმართველობის არჩევნებში ქართულმა ოცნებამ ხმების 81.68% მიიღო, გირჩმა – 7.481%, კოალიციამ ძლიერი საქართველო — ლელო – 6.715 %, გახარია საქართველოსთვის 3.684%.

2025 წლის 4 ოქტომბრის მუნიციპალურმა არჩევნებმა ავტორიტეტული საერთაშორისო და ადგილობრივი დამკვირვებლების გარეშე ჩაიარა. არჩევნებზე სადამკვირვებლო მისია არ გამოუგზავნია ეუთო/ოდირს. ოცნების ხელისუფლებამ ოდირის მისია 6 სექტემბერს, არჩევნებამდე თითქმის 1 თვით ადრე მოიწვია, რის შემდეგაც ორგანიზაციამ გაავრცელა განცხადება, სადაც ეწერა, რომ "არჩევნებამდე თვეზე ნაკლებ ვადაში მოწვევა არსებით დაკვირვებას შეუძლებელს ხდის".