ფსიქოლოგიისა და ფსიქიკური ჯანმრთელობის სფეროს წარმომადგენლები ოცნების პრემიერის, ირაკლი კობახიძისა და ოცნების პარლამენტის თავმჯდომარის, შალვა პაპუაშვილის მხრიდან პროფესორ მარინა ჩიტაშვილისადმი გაჟღერებულ ბრალდებებს ეხმაურებიან.

მათ მხარდამჭერი პეტიცია შექმნეს, სადაც აღნიშნულია, რომ ფსიქოლოგები, ფსიქოთერაპევტები და ფსიქიკური ჯანმრთელობის სფეროს სპეციალისტები პროფესორ მარინე ჩიტაშვილის მიმართ უპირობო მხარდაჭერას გამოხატავენ.

"ჩვენ, ფსიქოლოგები, ფსიქოთერაპევტები და ფსიქიკური ჯანმრთელობის სფეროს სპეციალისტები, გამოვხატავთ უპირობო მხარდაჭერას ფსიქოლოგიის დარგის ერთ-ერთი ყველაზე ღირსეული წარმომადგენლის, პროფესორ მარინე ჩიტაშვილის მიმართ, რომელიც უკანასკნელ დღეებში მიზანმიმართული დეზინფორმაციული კამპანიის სამიზნე გახდა.

მარინე ჩიტაშვილი მრავალი წელია წარმოადგენს ფსიქოლოგიისა და სოციალური მეცნიერებების განვითარებაში ერთ-ერთ უმნიშვნელოვანეს ფიგურას (მეტრს) საქართველოში. მისი აკადემიური და პროფესიული საქმიანობა ყოველთვის გამოირჩეოდა ეთიკის, დამოუკიდებლობისა და კრიტიკული აზროვნების მაღალი სტანდარტებით.

საქართველოს პრემიერის და პარლამენტის თავმჯდომარის განცხადებები, რომლებიც პროფესორ ჩიტაშვილს "რადიკალური ოპოზიციის პროპაგანდისტად" წარმოაჩენენ, წარმოადგენს საგანგაშო საფრთხეს — საუნივერსიტეტო და აკადემიური სფერო მოექცეს პოლიტიკური დაპირისპირებების ქვეშ", — წერია პეტიციის აღწერაში.

განცხადებაში ასევე წერია, რომ პროფესორ ჩიტაშვილის დისკრედიტაციის მცდელობა მხოლოდ კონკრეტული ადამიანის წინააღმდეგ ჩადენილი უსამართლობა არ არის — ეს აკადემიური თავისუფლების, კრიტიკული აზროვნების და პროფესიული ავტონომიის დასუსტების მცდელობაა. ფსიქოლოგიისა და ფსიქიკური ჯანმრთელობის სფერო მოუწოდებს ყველა პროფესიულ და აკადემიურ საზოგადოებას, დაიცვან ის ღირებულებები, რომლებზეც დგას მათი პროფესია — თავისუფლება, სამართლიანობა და პიროვნული კეთილდღეობა.

"მიგვაჩნია, რომ პროფესორ ჩიტაშვილის დისკრედიტაციის მცდელობა არის არამხოლოდ კონკრეტული ადამიანის წინააღმდეგ მიმართული უსამართლობა, არამედ მცდელობა, დაასუსტონ აკადემიური თავისუფლება, კრიტიკული აზროვნება და პროფესიული ავტონომია.

ფსიქოლოგიის სფერო ემყარება ადამიანის ღირსების პატივისცემას, ემპათიას და სამართლიანობას. ამიტომ ჩვენთვის მიუღებელია ნებისმიერი ქმედება, რომელიც არღვევს ამ პრინციპებს, მათ შორის — პოლიტიკური ანგარიშსწორება ან მიზანმიმართული კამპანია ჩვენს კოლეგაზე.

ჩვენ ვუცხადებთ მხარდაჭერას მარინე ჩიტაშვილს, ვუერთდებით მის ღირსეულ პოზიციას და მოვუწოდებთ ყველა პროფესიულ და აკადემიურ საზოგადოებას, დაიცვან ის ღირებულებები, რომლებზეც დგას ჩვენი პროფესია — თავისუფლება, სამართლიანობა და პიროვნული კეთილდღეობა.

ფსიქოლოგიისა და ფსიქიკური ჯანმრთელობის სფერო, რომელიც დაფუძნებულია ცნობიერების, ემპათიისა და პასუხისმგებლობის პრინციპებზე, ვერ დარჩება გულგრილი ასეთი საჯარო ცილისწამებისა და ღირსების შელახვის მცდელობის წინაშე.

ჩვენ ვდგავართ მის გვერდით როგორც კოლეგები, როგორც მეცნიერები და როგორც ადამიანები, ვინც იცის, რომ სიბნელეს მხოლოდ განათლებით ებრძვიან.

ღირსება", — წერია პეტიციის აღწერაში.

შეგახსენებთ, რომ "პირველ არხის" ეთერში ოცნების პარლამენტის თავმჯდომარემ, შალვა პაპუაშვილმა 4 ოქტომბერს თბილისში განვითარებულ მოვლენებზე საუბრისას თბილისის სახელმწიფო უნივერსიტეტის პროფესორს, ფსიქოლოგ მარინა ჩიტაშვილს "რადიკალური ოპოზიციის ერთ-ერთი პროპაგანდისტი" უწოდა.

ქართული ოცნების პრემიერმა, ირაკლი კობახიძემ ბრიფინგზე, ტელეკომპანია იმედის ჟურნალისტის დასმული კითხვის საპასუხოდ, თსუ-ის პროფესორ მარინა ჩიტაშვილზე საუბრისას თქვა, რომ საუნივერსიტეტო სისტემაში "ძალიან მძიმე, ტრაგიკული მდგომარეობაა".

"ტრაგიკული მდგომარეობაა ჩვენს საუნივერსიტეტო სისტემაში, რაც ძალიან მძიმეა. როგორ შეიძლება, ასეთი ადამიანები ასწავლიდნენ თბილისის სახელმწიფო უნივერსიტეტში. თუმცა, მინდა შეგახსენოთ, რომ თავის დროზე, როცა იყო ჩამოყალიბებული ავტორიტარული სისტემა, 2004-2012 წლებში ბოლომდე შეაღწია მაშინდელმა ავტორიტარულმა მმართველობამ უნივერსიტეტებში, მათ შორის თსუ-შიც.

მათ შორის, საკადრო საკითხებს ალაგებდა პირდაპირ მაშინდელი ავტორიტარული მმართველობა და ამის გამოძახილია, რომ მრავლად არიან დღესაც ასეთი ადამიანები უნივერსიტეტში, მათ შორის, სახელმწიფო უნივერსიტეტშიც. ეს არის ტრაგიკული მოვლენა", — თქვა კობახიძემ.

კარიკატურულია მარინეში ვინმემ მოძალადე პროფესორი დაინახოს! — იაგო კაჭკაჭიშვილი "ქართულ ოცნებას" მიმართავს