დეკანოზი გიორგი მამალაძის ადვოკატი, გიორგი ფანცულაია აცხადებს, რომ პროკურატურისთვის ჩვენების მიცემას არ აპირებს. მისი თქმით, ეს არ არის "რეალური გამოძიება":

"არანაირი ინფორმაციის მიწოდებას არ ვაპირებ... ეს არის დადგმული სპექტაკლი, წინააღმდეგ შემთხვევაში სისხლის სამართლის პასუხისგებაში უნდა იყოს მიცემული ჯარჯი წიკლაური [პროკურორი], დაკითხული უნდა იყოს და რეალური გამოძიება უნდა იყოს დაწყებული ყველა პროკურორის, გამომძიებლების წინააღმდეგ, ვისაც საქმის მასალები მოეპოვება, ბესიკ ბუგიანიშვილის [მოსამართლე] წინააღმდეგ, სასამართლოს ტექნიკური თანამშრომლების წინააღმდეგ".

გუშინ, 4 ოქტომბერს, პროკურატურაში დაკითხვაზე იყო დეკანოზის კიდევ ერთი ადვოკატი, მიხეილ რამიშვილი. მანაც უარი განაცხადა ჩვენების მიცემაზე და მოითხოვა, რომ მისი დაკითხვა მაგისტრი მოსამართლის თანდასწრებით მოხდეს.

საქართველოს პროკურატურამ ე.წ. ციანიდის საქმის სასამართლო სხდომების ჩანაწერების მედიაში მოხვედრის საქმეზე გამოძიება დაიწყო. უწყებაში ამბობენ, რომ საქმეს გამოძიების მონაცემების გახმაურების ფაქტზე იძიებენ.

რამდენიმე დღის განმავლობაში ტელეკომპანია პირველი და რუსთავი 2 ე.წ. ციანიდის საქმის სასამართლო განხილვების ჩანაწერებს ასაჯაროებდნენ. საქართველოს პროკურატურამ ამ საქმეზე ბრალდებულის, დეკანოზ გიორგი მამალაძის ადვოკატებს გაუთქმელობის პირობა დაადებინა, რაც მათ საქმის დეტალებზე საჯაროდ საუბარს უკრძალავდათ.