ქართული ოცნების მთავრობის ადმინისტრაციის ცნობით, ოცნების პრემიერი ირაკლი კობახიძე დანიაში იმყოფება სადაც ის EPC-ის რიგით მე-7 სამიტში მიიღებს მონაწილეობას, რომელიც კოპენჰაგენში გაიმართება.

დანიის საგარეო უწყებამ ტელეკომპანია "ფორმულას" უპასუხა, რომ EPC არ არის ევროკავშირის ფორმატის შეხვედრა და EPC-ის ჩარჩო არ ცვლის ევროკავშირის არსებულ პოზიციებსა და პოლიტიკას საქართველოსთან დაკავშირებით

"ევროპული პოლიტიკური გაერთიანების სამიტი (EPC) პოლიტიკური და სტრატეგიული დიალოგის უფრო ფართო ევროპული ფორუმია. დანია აგრძელებს მონაწილეობის ფორმატს, რომელიც დადგენილია ევროპის პოლიტიკური გაერთიანების (EPC) წინა ექვსი შეხვედრის დროს, მათ შორის ალბანეთში 2025 წლის მაისში გამართული ბოლო შეხვედრის დროს. შესაბამისად, საქართველოც მიწვეული იქნება კოპენჰაგენში დაგეგმილ EPC-ზე.

EPC არ არის ევროკავშირის ფორმატის შეხვედრა და EPC-ის ჩარჩო არ ცვლის ევროკავშირის არსებულ პოზიციებსა და პოლიტიკას საქართველოსთან დაკავშირებით. ევროკავშირმა და დანიამ არაერთხელ გამოთქვეს შეშფოთება საქართველოში არსებული მდგომარეობის გაუარესების გამო", — განაცხადეს დანიის საგარეო საქმეთა სამინისტროში.

ირაკლი კობახიძე დანიაში გუშინ გაემგზავრა. ოცნების ხელისუფლების მთავრობის ადმინისტრაციის ცნობით, ოცნების პრემიერმინისტრი "ირაკლი კობახიძე ევროპული პოლიტიკური გაერთიანების სამიტში (EPC) მონაწილე ლიდერთა პატივსაცემად დანიის მეფისა და დედოფლის სახელით გამართულ მიღებას დაესწრო.

დანიის მეფე ფრედერიკ X-მ და დედოფალმა მერი ელიზაბეთმა სამიტის მონაწილე ლიდერებს კოპენჰაგენში, ამალიენბორგის სასახლეში უმასპინძლეს.

საქართველოს მთავრობის მეთაური EPC-ის რიგით მე-7 სამიტში მიიღებს მონაწილეობას, რომელიც კოპენჰაგენში ხვალ გაიმართება", — ნათქვამია გავრცელებულ ინფორმაციაში.

ირაკლი კობახიძე დანიაში

ირაკლი კობახიძე დანიაში