ტანგ რენჯიანს, ჩინეთის სოფლის მეურნეობისა და სოფლის საქმეთა ყოფილ მინისტრს, კორუფციისთვის სიკვდილი პირობითად მიუსაჯეს. ჟილინის პროვინციის სასამართლოს ამ გადაწყვეტილებასთან დაკავშირებით ინფორმაციას Reuters ჩინეთის სახელმწიფო სააგენტო სინხუაზე დაყრდნობით ავრცელებს.

სინხუას ცნობით, ტანგმა 2007-2024 წლებში დაკავებული სხვადასხვა თანამდებობიდან ქრთამის სახით ნაღდი ფული და ქონება მიიღო, რომლის საერთო ღირებულება 268 მილიონ იუანს (37.6 მილიონ დოლარს) აღემატება.

სასამართლომ მის მიერ დანაშაულის აღიარების გათვალისწინებით ყოფილ მინისტრს სიკვდილით დასჯის განაჩენი ორი წლით გადაუვადა.

ჩინეთის კომუნისტურმა პარტიამ ტანგი 2024 წლის ნოემბერში, ექვსი თვით მას შემდეგ გარიცხა, რაც ანტიკორუფციულმა ორგანომ გამოძიება დაიწყო და თანამდებობიდანაც გაათავისუფლა.

ტანგი 2017-2020 წლებში დასავლეთის პროვინცია გასუს გუბერნატორი იყო, შემდეგ კი სოფლის მეურნეობისა და სოფლის საქმეთა მინისტრად დაინიშნა.

იანვარში ჩინეთის პრეზიდენტმა, სი ძინპინმა განაცხადა, რომ კორუფცია ჩინეთის კომუნისტური პარტიისთვის ყველაზე დიდი საფრთხეა და იგი კვლავ მზარდია.

ცნობისთვის, გადავადებული სიკვდილით დასჯა არის სისხლის სამართლის სასჯელი, რომელიც მოცემულია ჩინეთის სახალხო რესპუბლიკის სისხლის სამართლის კოდექსის მე-5 თავის (სიკვდილით დასჯა), 48-ე, 50-ე და 51-ე მუხლებში. ეს არის ორწლიანი პირობითი მსჯავრი, რომლის დროსაც სიკვდილით დასჯა მხოლოდ იმ შემთხვევაში ხორციელდება, თუ მსჯავრდებული გადავადებული ვადის განმავლობაში კიდევ ჩაიდენს დანაშაულებს.