რუსეთის ფინანსთა სამინისტრომ 2026 წლის ბიუჯეტის პროექტი და 2027–2028 წლების გეგმა მოამზადა, რომლის მიხედვითაც დამატებული ღირებულების საერთო გადასახადი (დღგ) 20-დან 22%-მდე გაიზრდება. ამის შესახებ ინფორმაციას Meduza ავრცელებს.

სამინისტროს განცხადებით, დამატებითი შემოსავალი ძირითადად თავდაცვისა და უსაფრთხოების ხარჯებს მოხმარდება.

შენარჩუნდება შემცირებული 10%-იანი დღგ სოციალური მნიშვნელობის საქონელზე, მათ შორის საკვებზე, წამლებსა და სამედიცინო პროდუქტებზე, საბავშვო ნივთებსა და სხვა აუცილებელ საქონელზე.

შემოსავლების გასაზრდელად დაგეგმილია სხვა ზომებიც: პანდემიის დროს დაწესებული დროებითი შეღავათების გაუქმება სადაზღვევო შენატანებზე, მცირე ბიზნესისთვის გამარტივებული დღგ-გადახდის ზღვრის შემცირება 60 მილიონიდან 10 მილიონ რუბლამდე (დაახლოებით $700,000-დან $100,000-მდე).

საგადასახადო კოდექსში შესატანი ცვლილებები, მათ შორის დღგ-ის ზრდა, ძალაში 2026 წლის 1 იანვრიდან შევა. ბიუჯეტის პაკეტი მთავრობას უკვე გადაეგზავნა და მოსალოდნელია, რომ სექტემბრის ბოლომდე სახელმწიფო დუმაში წარდგება.

The Bell-ის ინფორმაციით, ეს ნაბიჯი მიმართულია თავდაცვის ხარჯების დაფარვისკენ. გამოცემის შეფასებით, დღგ-ის გაზრდა ბიუჯეტს დამატებით 0.5% მშპ-ს (მთლიან შიდა პროდუქტს), ანუ დაახლოებით 1 ტრილიონ რუბლს ($12 მილიარდი) მოუტანს წელიწადში.

Meduza-ს ცნობით, რუსეთმა დღგ ბოლოს 2019 წლის იანვარში გაზარდა — 18-დან 20%-მდე.