ლელო — ძლიერი საქართველოს ბოლნისის ყოფილმა მერობის კანდიდატმა, ასაფ ჩირაგოვმა განაცხადა, რომ მან "ოცნებას" კანდიდატურა თავისი ნებით დათმო ოცნების კანდიდატის სასარგებლოდ და ირაკლი კუპრაძის ვერსიას მის დაშინებასა და ზეწოლაზე სიმართლეს არ შეესაბამება.

"საზოგადოებამ, განსაკუთრებით კი ბოლნისის მოსახლეობამ, კარგად იცის, რომ პოლიტიკურმა პარტია "ლელომ" ბოლნისში მერობის კანდიდატად დამასახელა. აღნიშნულ შემოთავაზებაზე თანხმობა მხოლოდ იმიტომ განვაცხადე, რომ ნამდვილად მაქვს სურვილი, ჩემი შესაძლებლობები მშობლიურ მხარეზე ზრუნვას მოვახმარო.

სამწუხაროდ, ძალიან მალე დავრწმუნდი, რომ კონკრეტული ადამიანები ცდილობენ, ჩემი რესურსი და გულწრფელი სურვილი საკუთარი პოლიტიკური ინტერესების დაკმაყოფილებისთვის, ინსტრუმენტად გამოიყენონ. მეორე მხრივ, დავრწმუნდი, რომ ქართული ოცნების კანდიდატი, ბატონი ზამურ ჭითანავა, გამარჯვების შემდეგ მართლაც იზრუნებს ბოლნისის განვითარებასა და მუნიციპალიტეტის მოსახლეობის ინტერესების დაცვაზე.

სწორედ ამიტომ, აღარ ვაპირებ ბატონ ზამურთან ხმების გაყოფას და გადავწყვიტე, საკუთარი კანდიდატურა მის სასარგებლოდ მოვხსნა.

დღესდღეობით ნამდვილად არ არის კინკლაობისა და უშინაარსო პოლიტიკური დაპირისპირების დრო, ახლა ყველაზე მთავარია შევინარჩუნოთ მშვიდობა და სტაბილურობა, რაზეც განვითარებისკენ მიმავალი ერთადერთი გზა გადის," — წერს ასაფ ჩირაგოვი.

ირაკლი კუპრაძემ დღევანდელ ბრიფინგზე განაცხადა, რომ ლელოს ბოლნისის მერობის კანდიდატს, ასაფ ჩირაგოვს კანდიდატურის მოხსნის სანაცვლოდ ფული შესთავაზეს. კუპრაძეს ინფორმაციით, ჩირაგოვმა თავდაპირველად უარი განაცხადა ფულად თანხაზე და ვარაუდობს, რომ მისი გადმობირება, სავარაუდოდ, მუქარის ფონზე მოხდა.

მანამდე, სოციალურ ქსელში ლელოს ბოლნისის მერობის კანდიდატმა, ასაფ ჩირაგოვმა სოციალურ ქსელში დაწერა — "აღარ ვაპირებ ბატონ ზამურთან [ჭიანავა] ხმების გაყოფას და გადავწყვიტე, საკუთარი კანდიდატურა მის სასარგებლოდ მოვხსნა". ჩირაგოვი აღნიშნავს, რომ "დარწმუნდა, რომ ქართული ოცნების კანდიდატი, ზამურ ჭითანავა, გამარჯვების შემდეგ მართლაც იზრუნებს ბოლნისის განვითარებასა და მუნიციპალიტეტის მოსახლეობის ინტერესების დაცვაზე".