ყახაზეთის რიგით მეორე უმდიდრესი ბიზნესმენი, ტიმურ ტურლოვი საქართველოში ფინანსური ინსტიტუტის, კერძოდ Freedom Bank Kazakhstan შვილობილი ბანკის დაარსებას გეგმავს. ამის შესახებ ინფორმაციას Forbes ავრცელებს.

საწყის ეტაპზე თბილისში, სააპლიკაციო კომპანია — სს FBG Company დარეგისტრირდება. სწორედ ეს კომპანია მართავს საბანკო ლიცენზიის მიღებისა და საქართველოს ეროვნული ბანკისთვის დოკუმენტების წარდგენის პროცესს. თუ ლიცენზია გაიცემა, კომპანია გარდაიქმნება კომერციულ ბანკად, გახდება მისი სამართალმემკვიდრე და ეწოდება სს Freedom Bank Georgia.

Freedom-ს ტაჯიკეთში ბანკი უკვე აქვს, რომელიც ასევე ყაზახური ბანკის შვილობილია. მან საბანკო ლიცენზია 2024 წლის ოქტომბერში მიიღო და ამჟამად ტექნიკურ რეჟიმში ფუნქციონირებს.

Freedom Bank Kazakhstan აქტივების მოცულობით მეათე ადგილზეა ყაზახეთის ბანკებს შორის. 2025 წლის 1-ელი აგვისტოს მონაცემებით, მისი აქტივები 2.2 ტრილიონ ტენგეს, რაც დაახლოებით 10 მლრდ ლარზე მეტია.

ტიმურ ტურლოვი Freedom Holding Corp-ის დამფუძნებელი და მისი 70%-ის მფლობელია. Forbes Kazakhstan-ის თანახმად, იგი 2025 წელს ქვეყნის მეორე უმდიდრეს ბიზნესმენად, ხოლო 2024 წელს — ყაზახეთის მეოთხე ყველაზე გავლენიან ბიზნესმენად დასახელდა. 2025 წლის მაისის მდგომარეობით, მისი ქონება 5.8 მილიარდ დოლარად იყო შეფასებული.