სპეციალური პენიტენციური დაწესებულების ინფორმაციით, გიორგი ჩიკვაიძეს ხანმოკლე პაემნების უფლება არ აეკრძალა და საზოგადოებას დეზინფორმაციის გავრცელების შეწყვეტისკენ მოუწოდებს. უწყების ცნობით, პატიმარმა სექტემბრის თვში უკვე ისარგებლა 2 ხანმოკლე პაემნით.

"საზოგადოების ინფორმირებისთვის განვმარტავთ, რომ მსჯავრდადებულ გ.ჩ.-ს, პენიტენციური კოდექსის 120-ე მუხლის შესაბამისად, 1 თვის განმავლობაში 2 ხანმოკლე პაემნის უფლება აქვს. შესაბამისად, სექტემბრის თვეში გ.ჩ-მ უკვე ისარგებლა კუთვნილი ხანმოკლე პაემნის უფლებით. კერძოდ, ერთი ხანმოკლე პაემნის უფლებით მან ისარგებლა 2025 წლის პირველ სექტემბერს, ხოლო თვის განმავლობაში კუთვნილი მეორე ხანმოკლე პაემანი საკუთარი წერილობითი თხოვნის საფუძველზე, შეეცვალა სატელეფონო საუბრის უფლებით, პენიტენციური კოდექსის 119-ე მუხლის მე-7 ნაწილის "ა" ქვეპუნქტის შესაბამისად. აქედან გამომდინარე, მსჯავრდადებულ გ.ჩ.-ს, ხანმოკლე პაემნით სარგებლობა 2025 წლის ოქტომბრამდე აღარ ეკუთვნის," — წერს უწყება.

უწყებამ ასევე განაცხადა, რომ "მსჯავრდებულს 1 წლის განმავლობაში აქვს 3 ხანგრძლივი პაემნის უფლება, რომლით სარგებლობაზეც უარს თავად აცხადებს (აღნიშნული დასტურდება შესაბამისი დოკუმენტაციით)".

გუშინ, ჩიკვაიძის დედამ, ეკა წერეთელმა სოციალურ ქსელში დაწერა, რომ მის შვილს "ნოდარ მელაძის შაბათის" ეთერში გასული რეპორტაჟის გამო პაემნების უფლება აეკრძალა. ცნობისათვის, რეპორტაჟში გიორგი ჩიკვაიძემ განაცხადა, რომ ე.წ ქოლცენტრების საქმეზე ინფორმაციას გაავრცელებდა.

დღეს, კი გავრცელდა ინფორმაცია, რომ გიორგი ჩიკვაიძემ შიმშილობა დაიწო. ცნობისთვის, დაპატიმრებულმა ბიზნესმენმა შიმშილობა მიმდინარე წლის 12 მარტსაც გამოაცხადა. 9-დღიანი შიმშილობის შემდეგ ჩიკვაიძის მდგომარეობა დამძიმდა და ის საავადმყოფოში გადაიყვანეს.