"რუსთავი 2"-ის საინფორმაციო სამსახურის ხელმძღვანელის, ნინო შუბლაძის გაკრიტიკების შემდეგ, გახარიას პარტიის წევრის, ანა ბუჩუკურის და მისი თანაგუნდელების აქტივობას არხი აღარ გააშუქებს. ამის შესახებ ტელეკომპანიის ახლად დანიშნული დირექტორის ბაკურ ბაკურაძის მიერ "რუსთავი 2"-ის სახელით გაკეთებულ განცხადებაში ნათქვამი.

ბაკურაძის განცხადება ანა ბუჩუკურის Facebook-პოსტს მოჰყვა, სადაც ოპოზიციონერი წერდა, რომ ნინო შუბლაძე "სააკაშვილის რეჟიმის დროს მაშინდელი პროპაგანდის მსახური" იყო, დღეს კი "ივანიშვილის რეჟიმის მსახურია".

ბაკურ ბაკურაძე ანა ბუჩუკურის განცხადებებს შეურაცხმყოფელს უწოდებს.

"ქალბატონი ბუჩუკურის დღევანდელი განცხადება ვეღარ დარჩება რეაგირების გარეშე. არხის სახელით ვაცხადებ, რომ ვიდრე ხსენებული პოლიტიკოსი საჯარო ბოდიშს არ მოიხდის მის მიერ გავრცელებული შეურაცხმყოფელი განცხადებისთვის, არხი უარს აცხადებს გააშუქოს გახარიას პოლიტიკური პარტიის ნებისმიერი აქტივობა. ასევე, მათ აღარ დაეთმობათ ეთერი ჩვენი არხის პოლიტიკურ გადაცემებში.

სამწუხაროდ, ცალკეული აგრესიული პოლიტიკოსების მხრიდან ჟურნალისტების შეურაცხყოფამ, განსაკუთრებით ბოლო პერიოდში, სისტემატური სახე მიიღო. მე, არხის დირექტორი და ჩვენი გუნდის არც ერთი წევრი არ მოვითმენთ მსგავს დამოკიდებულებას აგრესიული პოლიტიკოსების მხრიდან," — აცხადებს "რუსთავი 2"-ის გენერალური დირექტორი ბაკურაძე.

პოსტი, რომელსაც "რუსთავი 2" გამოეხმაურა, ბუჩუკურმა დღეს, 18 სექტემბერს გამოაქვეყნა.

"გუშინ სუს-ის ფილიალის "რუსთავი 2-ის" თანამშრომელს, ქალბატონ ნინო შუბლაძეს ეთერში ნაწყენს უთქვამს, რომ თურმე ჩემზე გაბრაზებულია და რომ თურმე ჟურნალისტებთან ქცევა არ ვიცი.

ამ ფრაზაში ყველაზე სასაცილო ის არის, რომ ქნი შუბლაძე საკუთარ თავს ჟურნალისტს უწოდებს. არა, ქალბატონო ნინო. თქვენ ჟურნალისტი არ ხართ. თქვენ პირადად მიხეილ სააკაშვილის რეჟიმის დროს მაშინდელი პროპაგანდის მსახური იყავით — ადამიანებს რომ აწამებდნენ, ზუსტად მაგ დროს. დღეს ივანიშვილის რეჟიმის მსახური ხართ. ხვალ იმას მოემსახურებით, ვინც მეტს გადაგიხდით. ეს არ არის ჟურნალისტობა.

სხვათა შორის, ეს სტატუსი ნინო შუბლაძეზე საერთოდ არ არის — ამ შემთხვევაში ეს ერთი ინდივიდი უბრალოდ მაგალითია პროფესია"მსახურის".

მე არ ვიცი, რატომ და როგორ მივედით იქამდე, რომ ეს ფენომენი საზოგადოებაში ნორმალიზდა…" — დაწერა ანა ბუჩუკურმა.