პროკურატურამ ოლიმპიურ ჩემპიონს და ოცნების ყოფილ დეპუტატს, ზურაბ ზვიადაურს იარაღის შეძენა-შენახვა და ტარების ფაქტებზე ბრალი წარუდგინა. უწყება მის პატიმრობას ითხოვს. ინფორმაციას პროკურატურამ ავრცელებს.

"შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა მართლსაწინააღმდეგოდ შეიძინა 9X29მმ (.38 Special) კალიბრის,WEBLEY SCOTT LTD კონსტრუქციის №56577 რევოლვერი და მისთვის განკუთვნილი ექვსი ქარხნული წესით დამზადებულ, 9X29 კალიბრის ვაზნა, რომელსაც მართლსაწინააღმდეგოდ ინახავდა და ატარებდა.

სამართალდამცველებმა ბრალდებული 2025 წლის 16 სექტემბერს დააკავეს. მას ბრალდება საქართველოს სისხლის სამართლის კოდექსის 236-ე მუხლის მესამე და მეოთხე ნაწილით (ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების პატიმრობის შეფარდების შუამდგომლობით, თბილისის საქალაქო სასამართლოს კანონით დადგენილ ვადაში მიმართავს", ­­­— წერია პროკურატურის მიერ გავრცელებულ ინფორმაციაში.

გუშინ, 17 სექტემბერს, NEWS.on.ge-ს შსს-ში დაუდასტურეს, რომ ქართველი ძიუდოისტი, ოლიმპიური ჩემპიონი და ქართული ოცნების ყოფილი დეპუტატი ზურაბ ზვიადაური 236-ე მუხლითაა დაკავებული, რაც იარაღის უკანონო შეძენა-შენახვა-ტარებას გულისხმობს, რაც ჯარიმით, ან თავისუფლების აღკვეთით ვადით 3-დან 5 წლამდე ისჯება.

ზვიადაურმა ორჯერ მოიპოვა ვერცხლის მედალი მსოფლიოს 2001 და 2003 წლების ჩემპიონატებზე, ხოლო ევროპის 2002 წლის ჩემპიონატზე ბრინჯაოს მედალი აიღო. ზვიადაურმა 2004 წლის ათენის ოლიმპიურ თამაშებში ოქროს მედალი მოიპოვა 90 კგ წონით კატეგორიაში და პირველი ოლიმპიური ჩემპიონი გახდა დამოუკიდებელი საქართველოს ისტორიაში.

რაც შეეხება მის პოლიტიკურ საქმიანობას, ზვიად ზვიადაური 2012-2016 წლებში იყო საქართველოს მე-8 მოწვევის პარლამენტის წევრი (ახმეტის მაჟორიტარი), საარჩევნო ბლოკ ბიძინა ივანიშვილი — ქართული ოცნების სიით.