საქართველოს ყოფილი მთავარი პროკურორი ოთარ ფარცხალაძე, რომელსაც ვანო მერაბიშვილი მისი ციხიდან უკანონოდ გაყვანაში ადანაშაულებს, რუსთავი 2-თან ექსკლუზიურ ინტერვიუში აცხადებს, რომ მისი დაკავების საფუძველი არ არსებობს:

"არა, ვერ დამაკავებენ, არც ველოდები და არც აქვთ საფუძველი, რომ დამაკავონ. ერთადერთი, თუ დაიწყო გამოძიება არ ვიცი, ეგეც ტელევიზიით მოვისმინე. თუ დაიწყო გამოძიება, ვითანამშრომლებ ყველანაირად. გამოძიება, იმედია, მივა ბოლომდე, შესაბამისად როგორც დაიწყება, ისე შეწყდება საქმე".

ადამიანის უფლებათა ევროპულმა სასამართლომ 14 ივნისს გამოტანილ გადაწყვეტილებაში აღნიშნა, რომ ვანო მერაბიშვილის მიმართ ქართულმა სახელმწიფომ დაარღვია კონვენციის მეხუთე მუხლის მესამე პუნქტი და მე-18 მუხლი პირველთან მიმართებით. დარღვევის ერთ-ერთი ეპიზოდი სწორედ ფარცხალაძის პროკურორობის პერიოდს ეხება.

საერთაშორისო გამჭვირვალობა - საქართველოს იურისტმა On.ge-ს განუცხადა, რომ ძირითადი მომენტი სასამართლოსთვის მთავარი პროკურორის მიერ მერაბიშვილის ციხიდან გაყვანის ეპიზოდი იყო, ანუ მთავარმა პროკურორმა გაიყვანა ის ციხიდან და ეს პროცესი მერაბიშვილმა ძალიან დეტალურად აღწერა. როგორც ევროსასამართლო ამბობს, ამაზე შემდეგ არანაირი გამოძიება არ ჩატარებულა – არ ამოიღეს ვიდეო ჩანაწერები და ერთ-ერთმა თანამშრომელმა დაადასტურა ეს ფაქტი, შემდეგ კი ის გაუშვეს სამსახურიდან. ამ ფაქტების შეჯამებით სასამართლომ დაასკვნა, რომ ასეთი რამ მართლაც მოხდა. ამ შემთხვევაში, წინასწარი პატიმრობა გამოიყენეს იმისთვის, რომ ზეგავლენა მოეხდინათ სააკაშვილის წინააღმდეგ მიმართული საქმეების გამოძიებისთვის და ჟვანიას გარდაცვალების საქმესთან დაკავშირებით.

რუსთავი 2-ის ჟურნალისტმა ოთარ ფარცხალაძეს ჰკითხა, ის ივანიშვილთან ახლობლობის გამო ხომ არ სარგებლობს ხელშეუხებლობის გარანტიით, რაზეც ასეთი პასუხი მიიღო:

"მომისმინე, ხელშეუხებლობა რა შუაშია, როდესაც არ მომხდარა ფაქტი, არ მინახია ეს ვანო მერაბიშვილი და არ შევხვედრილვარ, ხელშეუხებლობა მანდ რა შუაშია.

ჟურნალისტი: ბიძინა ივანიშვილთან ისევ გაქვთ ურთიერთობა? ბოლო ინტერვიუს დროს გვითხარით, რომ ძალიან ახლო ურთერთობა გქონდათ.

-კი, მაქვს და მექნება ყოველთვის.

ჟურნალისტი: საქმიანი?

-ნუ, გადავდოთ.

ჟურნალისტი: ევროსასამართლომ თქვა, რომ მტკიცებულებათა ერთობლიობით დაგვრჩა განცდა, რომ ვანო მერაბიშვილი გამოიყვანეს ციხიდან და მასზე ხორციელდებოდა.

-მომისმინე ერთი წუთი, რა განცდა დარჩა, ეგ არის ევროსასამართლოს საკითხი და გადასაწყვეტი, მე არ ვიცი რა განცდა დარჩათ, დარჩა- დარჩეთ.