რუსული ავიაკომპანია "აზიმუტი" თბილისის მიმართულებით ფრენებს კრასნოდარის აეროპორტიდანაც იწყებს. ამის შესახებ ინფორმაცია კომპანიის ვებგვერდზე გავრცელდა.

კრასნოდარი-თბილისის პირველი რეისი 23 სექტემბერსაა დაგეგმილი.

"აზიმუტის" ოფიციალურ გვერდზე გავრცელებულ განცხადებაში აღნიშნულია, რომ ავიაკომპანია მგზავრებს, რომლებსაც მინვოდიდან და სოჭიდან გასამგზავრებელი ბილეთები ჰქონდათ შეძენილი, თბილისის ან დუბაის მიმართულებით, ბილეთების გადაცვლა კრასნოდარის აეროპორტიდან განსახორციელებელ რეისებზეც შეეძლებათ.

"აზიმუტის ავიახაზები" იუწყება, რომ 2025 წლის 20 ოქტომბრამდე მგზავრებს, რომელთა გამგზავრება მინვოდიდან ან სოჭიდან არის დაგეგმილი, შეუძლიათ უფასოდ შეცვალონ გამგზავრების აეროპორტი კრასნოდარით. იგივე შესაძლებლობა ვრცელდება ჩამოსვლაზეც — მგზავრის სურვილის შემთხვევაში დანიშნულების აეროპორტის შეცვლა კრასნოდარზე ასევე ჯარიმებისა და დამატებითი გადასახადების გარეშე მოხდება [...] ავიაკომპანია კრასნოდარის საბაზისო აეროპორტიდან ახალი რეისების შესახებ აცხადებს: 23 სექტემბრიდან დაიწყება ფრენები თბილისისკენ, 26 სექტემბრიდან კი დუბაის მიმართულებით. მანამდე უკვე გაიხსნა ბილეთების გაყიდვები სტამბოლის, ანტალიისა და ერევნის რეისებზე", — წერია გავრცელებულ ინფორმაციაში.

BM.GE-ის ცნობით, კრასნოდარის აეროპორტი რუსეთ-უკრაინის ომის გამო, უსაფრთხოების მიზნით დახურული 11 აეროპორტიდან ერთ-ერთია. ისინი 2022 წლის თებერვლიდან აღარ ოპერირებდნენ. 2024 წლის მაისში ფრენები ელისტის აეროპორტიდან აღდგა, მიმდინარე წლის ივლისიდან კი — გელეჯინკიდან.