"სწორი გადაწყვეტილების მიღება არასდროსაა გვიანი — "ადგილობრივი თვითმმართველობის არჩევნებში" მონაწილეობაზე უარის თქმა ახლაც კი დიდ ზიანს მიაყენებს რეჟიმს და გააძლიერებს სახალხო, ეროვნულ წინააღმდეგობას," — ამის შესახებ პარტია თავისუფლების მოედნის ლიდერმა ლევან ცუცქირიძემ განაცხადა და აღნიშნა, რომ ერთადერთი სწორი არჩევანი ახლა "ამ ე.წ. "არჩევნებში" მონაწილეობაზე უარის თქმაა".

მან მხარდამჭერებს მოუწოდა კიდევ უფრო აქტიური მონაწილეობისკენ პროტესტსა და წინააღმდეგობაში, რადგან ცუცქირიძის განცხადებით, "სწორედ აქ გადის უსამართლო რეჟიმთან ბრძოლის ნამდვილი ხაზი".

"ვულოცავ მამუკა ხაზარაძესა და ბადრი ჯაფარიძეს, ისევე როგორც მათ ოჯახებს თავისუფლებას. ისინი, ისევე როგორც სხვა პოლიტპატიმრები, ციხეში უსამართლოდ იმყოფებოდნენ.

არ ვცდებოდით, როდესაც ვამბობდით, რომ ძლიერი საქართველოს გადაწყვეტილება მონაწილეობა მიეღო "ადგილობრივ არჩევნებად" წოდებულ სპეცოპერაციაში მძიმე პოლიტიკური შეცდომა იქნებოდა და ახლა კიდევ უფრო ცხადად ჩანს, რომ ეს ასეა.

ერთადერთი სწორი არჩევანი ახლა ამ ე.წ. "არჩევნებში" მონაწილეობაზე უარის თქმაა. სწორი გადაწყვეტილების მიღება არასდროსაა გვიანი — "ადგილობრივი თვითმმართველობის არჩევნებში" მონაწილეობაზე უარის თქმა ახლაც კი დიდ ზიანს მიაყენებს რეჟიმს და გააძლიერებს სახალხო, ეროვნულ წინააღმდეგობას.

თავისუფლების მოედანი ვაგრძელებთ პრინციპულ და თანმიმდევრულ ბრძოლას ივანიშვილის ავტორიტარიზმის წინააღმდეგ. გვჯერა, რომ ამ რეჟიმის დამარცხება შესაძლებელია მხოლოდ მორალური უპირატესობითა და სიცხადით და არა მათ თვალთმაქცურ თამაშებში ჩაბმით.

კვლავ მოვუწოდებ ჩვენს მხარდამჭერებს კიდევ უფრო აქტიური მონაწილეობისკენ პროტესტსა და წინააღმდეგობაში, რადგანაც სწორედ აქ გადის უსამართლო რეჟიმთან ბრძოლის ნამდვილი ხაზი.

გამარჯვება ჩვენი იქნება. წინ საქართველო!" — წერს ლევან ცუცქირიძე სოციალურ ქსელში.

ლელო — ძლიერი საქართველოს ლიდერებმა, მამუკა ხაზარაძემ და ბადრი ჯაფარიძემ რუსთავის მე-12 დაწესებულება ცოტა ხნის წინ დატოვეს. ოპოზიციის ლიდერებმა რუსთავის ციხის დატოვების შემდეგ განაცხადეს, რომ სხვა ლიდერების მოწოდების მიუხედავად, ლელო ­— ძლიერი საქართველო 4 ოქტომბრის თვითმმართველობის არჩევნებში მონაწილეობას მიიღებს.

შეგახსენებთ, მამუკა ხაზარაძის და ბადრი ჯაფარიძის შეწყალების შესახებ განცხადება ოცნების არჩეულმა პრეზიდენტმა, მიხეილ ყაველაშვილმა დღეს, 5 სექტემბერს გაავრცელა.