30 სექტემბერს, ვაკის პარკში, ილიას სახელმწიფო უნივერსიტეტის რიგით მეექვსე სამეცნიერო პიკნიკი გაიმართა.

2017 წლის სამეცნიერო პიკნიკზე წარმოდგენილი იყო 36 კარავი, რომელიც უნივერსიტეტებს, არასამთავრობო ორგანიზაციებს, კერძო და საჯარო სასწავლო დაწესებულებებს და საქართველოს სხვადასხვა რეგიონების სკოლებს დაეთმოთ. წარმოდგენილმა ორგანიზაციებმა საინტერესო ექსპერიმენტები ჩაატარეს და ინტერაქციული გამოფენები წარმოადგინეს.

ღონისძიების ფარგლებში გაიმართა სამეცნიერო პიკნიკისთვის სპეციალურად დადგმული სპექტაკლი „ყვავილების ალქიმია“. სცენა ასევე დაეთმო „ექსპერიმენტორიუმს“ , რომელიც სახალისო და საინტერესო შოუპროგრამით იყო წარმოადგენილი.

ილიაუნის სამეცნიერო კაფეში ილიაუნის მეცნიერებმა წაიკითხეს საჯარო ლექციები სხვადასხვა საინტერესო თემებზე.

ილიაუნის სამეცნიერო პიკნიკის ფარგლებში გაიმართა პირველკურსელებისადმი მიძღვნილი კონცერტი, რომელშიც მონაწილეობა მიიღებეს ჯგუფებმა: არა და MokuMoku.

ილიაუნის სამეცნიერო პიკნიკი საქართველოში ერთ-ერთი პირველი ღონისძიებაა, რომელიც ღია ცის ქვეშ მეცნიერების პოპულარიზაციის მიზნით ყოველწლიურად იმართება. ღონისძიება უპირველესად განკუთვნილია სკოლის ასაკის მოზარდებისთვის, თუმცა საინტერესოა ნებისმიერი ასაკის ადამიანებისთვისაც.

პიკნიკის მთავარი ამოცანაა სახალისო ფორმით წარმოაჩინოს თანამედროვე მეცნიერების მიღწევები, განსაკუთრებით – საბუნებისმეტყველო დისციპლინებში.