Paramount-მა ხელშეკრულება გააფორმა Microsoft-ის კუთვნილ ვიდეოთამაშების გამომცემელ Activision-თან, რომ თავისი Call of Duty ფრენჩაიზი დიდ ეკრანზე გადაიტანოს.

პარტნიორობის ფარგლებში პარამაუნთი განავითარებს, აწარმოებს და გაავრცელებს სრულმეტრაჟიან ფილმს Call of Duty-ის სამყაროზე, რომელიც 2003 წელს პირველი CoD-ის გამოსვლის შემდეგ უკვე 30-ზე მეტ ძირითად თამაშს მოიცავს. ამ გიგანტური შეთანხმების ღირებულება არ ხმაურდება.

წყაროები Variety-ს ეუბნებიან, რომ მიუხედავად იმისა, რომ ხელშეკრულება ერთ მასშტაბურ Call of Duty-ის ფილმზეა ორიენტირებული, ის მოიცავს შესაძლებლობას, პარამაუნთმა CoD-ის სამყარო ფილმებსა და სატელევიზიო პროექტებშიც გააფართოოს. ჯერჯერობით უცნობია, კონკრეტულად რაზე იქნება კონცენტრირებული Call of Duty-ის ფილმი, თუმცა ვიდეოთამაშის ფრენჩაიზის ბირთვი პირველპირიანი სამხედრო შუთერია. ბევრი თამაშია ერთმანეთთან დაკავშირებული სიუჟეტითა და პერსონაჟებით — მათ შორის Treyarch-ის მიერ შექმნილი Black Ops, რომლის მეშვიდე ნაწილი, Black Ops 7, ამ შემოდგომაზე გამოდის.

Call of Duty-ის შეთანხმება იმ მასშტაბური ნაბიჯების გაგრძელებაა, რომელიც პარამაუნთის მიერ დევიდ ელისონის Skydance-თან $8 მილიარდიან შერწყმას მოსდევს. შერწყმის დამტკიცების შემდეგ კომპანიამ Netflix-იდან გადაიბირა Stranger Things-ის შემქმნელები — ძმები დაფერები და $7.7 მილიარდი გადაიხადა, რომ მომდევნო შვიდი წლის განმავლობაში UFC-ის ღონისძიებების ექსკლუზიური პარტნიორი გამხდარიყო.

Activision, რომელიც ახლა Microsoft Gaming-ის ქვეშ ფუნქციონირებს, თავადაც მასშტაბური შერწყმის ნაწილი იყო ორი წლის წინ, როცა Microsoft-მა დაასრულა $68.7 მილიარდიანი Activision Blizzard-ის შესყიდვა, რაც ტექნოლოგიურ გიგანტს Call of Duty-ზე და სხვა პოპულარულ ვიდეოთამაშებზე კონტროლს აძლევს.

წლების განმავლობაში ჰოლივუდს ვიდეოთამაშების ადაპტაციაში წარმატების მიღწევა უჭირდა, მაგრამ ბოლო ხანებში მან მოახერხა ისეთი ჰიტების შექმნა, როგორებიცაა Mortal Kombat და Super Mario Bros. ასევე წელს გამოსული ფილმი მაინკრაფტი. პარამაუნთმა უკვე მიაღწია წარმატებას ზღარბი სონიკის ადაპტაციით.

Call of Duty-ს შემთხვევაში, პარამაუნთს ხელთ ექნება არა მხოლოდ ერთ-ერთი ყველაზე წარმატებული ვიდეოთამაშის ფრენჩაიზი მსოფლიოში, რომელმაც 2022 წლისათვის 500 მილიონი ასლი გაყიდა და $30 მილიარდი შემოსავალი მიიღო, არამედ ფრენჩაიზი, რომელიც აქამდე არც ფილმად და არც სატელევიზიო პროექტად არ ქცეულა.

"როგორც Call of Duty-ის მთელი ცხოვრების ფანი, ეს ნამდვილად ოცნების ასრულებაა", — განაცხადა პარამაუნთის თავმჯდომარემ და გენერალურმა დირექტორმა დევიდ ელისონმა. "პირველი Call of Duty-ის კამპანიებიდან Modern Warfare-სა და Black Ops-ის სერიებამდე, უსასრულო საათები მაქვს გატარებული ამ ფრენჩაიზთან, რომელსაც უზომოდ ვაღმერთებ. Activision-ისა და მოთამაშეების ნდობა მთელ მსოფლიოში, რომ ეს საოცარი სიუჟეტური სამყარო დიდ ეკრანზე გადავიტანოთ, ჩვენთვის ერთდროულად პატივია და პასუხისმგებლობა, რომელსაც სერიოზულად ვეკიდებით".

"არსებობის ისტორიის განმავლობაში Call of Duty-მ ჩვენი წარმოსახვა მოიცვა დაუჯერებელი მოქმედებითა და ინტენსიური ისტორიებით, რომლებმაც მილიონობით ადამიანი გააერთიანა მთელ მსოფლიოში, და ამ თამაშების შექმნაზე ფოკუსი უცვლელი რჩება", — განაცხადა Activision-ის პრეზიდენტმა რობ კოსტიჩმა — "პარამაუნთში ვიპოვეთ ფანტასტიური პარტნიორი, რომელთან ერთადაც ამ ემოციურ, სუნთქვისშემკვრელ მოქმედებას დიდ ეკრანზე გადავიტანთ, როგორც განსაზღვრულ კინომომენტს. ფილმი პატივს მიაგებს და გააფართოებს იმას, რაც ამ ფრენჩაიზს თავიდანვე განსაკუთრებულს ხდიდა, და ჩვენ ერთი სული გვაქვს მუშაობის შევუდგეთ".