საქართველოში ჯანსაღი პოლიტიკური სისტემის ჩამოყალიბების ხელშეშლას მიხეილ სააკაშვილთან და ნაციონალურ მოძრაობასთან ერთად, ახორციელებენ დასკვნაში სახელობითად მოხსენიებული არასამთავრობო ორგანიზაციები, რომლებიც უცხოეთიდან ფინანსდებიან. ასევე, ნაციონალური მოძრაობის წიაღიდან ამოსული ისეთი პოლიტიკური გაერთიანებები, როგორიცაა კოალიცია — ცვლილებისთვის და ნაციონალურ მოძრაობასთან სრულ კოორდინაციაში მყოფი ძლიერი საქართველო და გახარია — საქართველოსთვის. ამის შესახებ თეა წულუკიანმა პარლამენტის პლენარულ სხდომაზე ე.წ საგამოძიებო კომისიის ანგარიშის წარდგენისას ისაუბრა.

მისი თქმით, "2012 წლიდან დღემდე მიხეილ სააკაშვილის, ნაციონალური მოძრაობის და მასთან დაკავშირებული ფიზიკური თუ იურიდიული პირების დესტრუქციული საქმიანობის ფონზე, საქართველოში ჯანსაღი პოლიტიკური სისტემა ვერ ჩამოყალიბდა".

"2012-2025 წწ-ში საქართველოს მუდმივად უწევდა ისეთ გამოწვევასთან გამკლავება, როგორიც იყო კონსტიტუციური წყობილების ძალადობით შეცვლის მრავალჯერადი მცდელობა, რომლის ძირითად შემსრულებლად დესტრუქციული ოპოზიცია და უცხოეთიდან დაფინანსებული არასამთავრობო ორგანიზაციები გვევლინებოდნენ. ამის გამო, 2012 წლიდან დღემდე, საქართველოს არ მისცემია არცერთი პოლიტიკურად მშვიდი წელიწადი. დესტრუქციულმა პოლიტიკურმა დღის წესრიგმა თითქმის სრულად დაიკავა ოპოზიციური პოლიტიკური ველი, რამაც მიუკერძოებელი სამოქალაქო სექტორის გაძლიერება, ახალგაზრდა თაობის წარმომადგენლებისთვის ოპოზიციური პოლიტიკური ჯგუფების ჩამოყალიბება შეაფერხა ან შეუძლებლად აქცია.

ვითარება განსაკუთრებით მას შემდეგ გამწვავდა, რაც 2022 წლის თებერვლიდან სახელმწიფოს მოუწია ძალიან მტკივნეული პროცესების დაძლევა და საქართველოს ომში ჩათრევის განუწყვეტელი მცდელობების მოგერიება. მის ხელთ არსებულ ფაქტებსა და ინფორმაციებზე დაყრდნობით, რომელიც მოცულობით დასკვნაში არის წარმოდგენილი, საგამოძიებო კომისია მიიჩნევს, რომ საქართველოში ჯანსაღი პოლიტიკური სისტემის ჩამოყალიბების ხელშეშლას მიხეილ სააკაშვილთან და ნაციონალურ მოძრაობასთან ერთად, ახორციელებენ დასკვნაში სახელობითად მოხსენიებული არასამთავრობო ორგანიზაციები, რომლებიც უცხოეთიდან ფინანსდებიან. ასევე, ნაციონალური მოძრაობის წიაღიდან ამოსული ისეთი პოლიტიკური გაერთიანებები, როგორიცაა კოალიცია — ცვლილებისთვის და ნაციონალურ მოძრაობასთან სრულ კოორდინაციაში მყოფი ძლიერი საქართველო და გახარია — საქართველოსთვის," — თქვა თეა წულუკიანმა.

ცნობისთვის, ოცნების პარლამენტში ე.წ. დროებითი საგამოძიებო კომისიის თავმჯდომარემ კომისიის 460-გვერდიანი დასკვნა წარადგინა, რის შემდეგაც მადლობა გადაუხადა კომისიის წევრებს გაწეული მუშაობისთვის. წულუკიანის თქმით, ეს დოკუმენტი "მალე გადაეცემა საქართველოს პარლამენტის არქივს და ამ ყველაფერს ჩვენი ისტორიკოსები და არა მხოლოდ ისტორიკოსები — ახალი თაობაც გამოიყენებს".