ოცნების ხელისუფლების პრემიერმინისტრმა, ირაკლი კობახიძემ ევროკავშირის რეკომენდაციების შესრულების შესახებ კომენტარი ჟურნალისტებთან საუბრისას გააკეთა. მისი თქმით, მზად არიან შეასრულონ აბსოლუტურად ყველა "გონივრული მოთხოვნა". მისივე თქმით, ევროკავშირი ვერ ასაბუთებს რატომ არის "გამჭვირვალობის კანონისა" და "ოჯახური ღირებულებებისა და არასრულწლოვანთა უფლებების" შესახებ კანონის გაუქმების მოთხოვნები გონივრული.

"ჩვენ მზად ვართ, შევასრულოთ აბსოლუტურად უკლებლივ ყველა გონივრული მოთხოვნა უნდა დაგვისაბუთონ, რომ მოთხოვნები არის გონივრული და ყველას შევასრულებთ. იყო გარკვეული მოთხოვნები, რომლებიც იყო გონივრული და თავიდან ბოლომდე შევასრულეთ. იყო არაგონივრული მოთხოვნები, ვერ დაგვისაბუთეს რატომ ითხოვდნენ ამ ყველაფერს, მათ შორის იგივე ოჯახურ ღირებულებებთან დაკავშირებით კანონის შესახებ რა მოთხოვნებიც ჰქონდათ, იგივე "გამჭვირვალობის შესახებ" კანონთან დაკავშირებით რა მოთხოვნებიც ჰქონდათ. ვერ ასაბუთებენ, რატომ არის გაუმჭვირვალობა კარგი. ვერაფრით ვერ ასაბუთებენ, ან რატომ არის კარგი ის, რომ ერთსქესიანმა წყვილმა აიყვანოს შვილად არასრულწლოვანი.დაასაბუთონ, ამასაც შევასრულებთ. ისინი ითხოვენ იმ კანონის გაუქმებას, სადაც წერია, რომ არ შეიძლება მაგალითად ერთნაირსქესიანმა წყვილმა აიყვანოს არასრულწლოვანი ბავშვი — რატომ ითხოვენ ამის გაუქმებას — დაგვისაბუთონ, დაასაბუთებენ — გვექნება რეაქცია. ყველაფერი საჭიროებს პრევენციას, უმძიმესი ტენდენციებია ევროპულ ქვეყნებში და ერთნაირსქესიანთა ქორწინების დაკანონება შესაბამისმა ძალებმა საბერძნეთშიც მოახერხეს.

ეს არის ძალიან მძიმე ტენდენციები და ჩვენ პრევენციულად უნდა ვიმოქმედოთ ამ ყველაფრის წინააღმდეგ, ეს არის სერიოზული პრობლემა. სტატისტიკაზე აისახება ეს ყველაფერი, სხვადასხვა ქვეყანაში მდგომარეობაზე აისახება ეს ყველაფერი. ჩვენ პრევენციულად უნდა დავუპირისპირდეთ ასეთ მოვლენებს და ასეთ სამომავლო მოთხოვნებს. სწორედ ამას ემსახურებოდა ეს კანონი. იგივე ეხებოდა "გამჭვირვალობის შესახებ" კანონს. ვერავინ ამ ქვეყანაზე ვერ დაასაბუთებს იმას, რომ გაუმჭვირვალობა სჯობს გამჭვირვალობას. უბრალოდ შეუძლებელია ამის დასაბუთება, დაასაბუთონ, კი ბატონო, მაგრამ დღემდე ვერავინ მოახერხა ამის დასაბუთება", — თქვა კობახიძემ

ოცნების პრემიერმა ასევე აღნიშნა, რომ ევროკავშირი მათ არაფერზე ესაუბრება და საბჭოური მეთოდებით ცდილობს მათთვის "ხელების გადაგრეხას".

"პრინციპულად არის ორი საკითხი, რასთან დაკავშირებითაც ჩვენ გვაქვს პრინციპული პოზიცია — ეს არის ოჯახური ღირებულებებისა და არასრულწლოვანთა უფლებების თემა და ეს არის გამჭვირვალობის თემა. ყველაფერი დანარჩენი არის ნაკლებად პრინციპული საკითხები ჩვენთვის, შესაბამისად, მზად ვართ ყველანაირი მსჯელობისთვის. რაც შეეხება ამ ორ კანონს, აქაც ვამბობთ, რომ დაგვისაბუთონ, რა და რატომ არ მოსწონთ, მაგრამ არაფერზე გვესაუბრებიან, საბჭოური მეთოდებით უნდათ, რომ ხელები გადაგვიგრიხონ და გვაიძულონ, რაც აბსოლუტურად არასწორია. გვესაუბრონ ყველაფერზე, დაგვისაბუთონ, დაგვაჯერონ, მაგრამ როცა არც გესაუბრებიან და ცდილობენ, ხელი გადაგიგრიხონ, ეს არ არის ევროპული მიდგომა, ეს არის საბჭოური მიდგომა", — განაცხადა კობახიძემ

ცნობისთვის, ევროკომისიამ ქართული ოცნების გაგზავნილი ანგარიშის შეფასება 1-ელ სექტემბერს დაიწყო — ამის შესახებ ევროსკოპი გვატყობინებს. მარკუს ლამერტმა არ გააკეთა კომენტარი იმის შესახებ, რა წერია ოცნების გაგზავნილ ანგარიშში.