კოალიცია ლელო — ძლიერი საქართველოს ლიდერები გრიგოლ გეგელია და ვატო სურგულაძე ამბობენ, რომ სახელმწიფომ სასწრაფო დახმარების 120-ზე მეტი მანქანა იყიდა, რომელიც ორი წელია გამოუყენებელია. ამის შესახებ მათ სასწრაფო სამედიცინო დახმარების ცენტრთან გამართულ ერთობლივ ბრიფინგზე განაცხადეს.

გრიგოლ გეგელიას თქმით, სახელმწიფომ აღნიშნული მანქანების შესაძენად 29 მილიონი ლარი გაფლანგა. მისივე თქმით, მანქანები სტანდარტს ვერ აკმაყოფილებს და მათი გამოყენება ამიტომ ვერ ხერხდება.

"ორი წელია, რაც სახელმწიფომ თქვენი ჯიბიდან 29 მილიონი გადაიხადა ამ მანქანების ყიდვაში, რომელიც აქ უქმად დგას და ჟანგდება. ის "ქოცურმა" უნიჭობამ და არაკომპეტენტურობამ ვერ გადააკეთა ადეკვატურად და ვერ ჩააყენა თქვენი და თქვენი ოჯახების ჯანდაცვის სამსახურში. 120-ზე მეტი მანქანა იყიდეს, მაგრამ მათი უმეტესი ნაწილი დგას აქ და ჟანგდება, ეს არის "ქოცური" არაკომპეტენტურობის, უნიჭობის, ტოტალური კორუფციული ჭაობის გამოხატულება, რაშიც წლების განმავლობაში ჩაგვძირეს და რომლის შედეგადაც თქვენი ჯიბიდან, თქვენი შვილების ჯიბიდან, ჩვენი ხანდაზმული საზოგადოების ჯიბიდან მილიონები არამიზნობრივად იფლანგება და მილიონები ხმარდება "ქოცური" იდიოტიზმის დაფინანსებას. ბატონი კუტიბაშვილი, რომელიც ამ შესყიდვის უფლებამოსილი პირი იყო, ძალიან მალევე გადაიყვანეს ქალაქის მუნიციპალური ლაბორატორიის ხელმძღვანელად, კიდევ ერთ მორიგ, თბილ პოზიციაზე, მისთვის არავის მოუთხოვია პასუხი ამ არამიზნობრივ ხარჯთან დაკავშირებით. არანაირი გამოძიება, არანაირი საქმე არ არის, თუ სად წავიდა 29 მილიონი თქვენი ჯიბიდან, რატომ არ ემსახურება ათობით მანქანა თქვენი ჯანმრთელობის გადარჩენას, თქვენს უკეთ ყოფნას.

"ქოცური" კორუფცია უნდა დასრულდეს, რადგან ეს ანტიქართული, ანტიადამიანური, ანტისოციალური ფენომენია, რომელიც თქვენი, თქვენი ოჯახების, ჩვენი ჯანდაცვის ხარჯზე ხდება. ჩვენ უნდა დავიბრუნოთ დაუყოვნებლივ, აქ და ახლა ჩვენი ქართული სახელმწიფო, ეს ქალაქი, ყველა დიდი ქალაქი და დავუბრუნოთ საღი აზრი, გამჭვირვალობა, ადამიანზე ორიენტირებული პოლიტიკა ჩვენს ქალაქებს და ჩვენს ქართულ სახელმწიფოს," — განაცხადა გრიგოლ გეგელიამ.

ძლიერი საქართველოს კიდევ ერთი ლიდერის, ვატო სურგულაძის განცხადებით, საქართველოში სასწრაფო დახმარების მანქანებით უზრუნველყოფა რეალური პრობლემაა.

"რატომ დგას ეს მანქანები აქ? იმიტომ რომ მოხდა ისეთი შესყიდვა, რომ საკმაოდ დიდი თანხა დაიხარჯა, როგორც აღმოჩნდა, ეს მანქანები კონდიციური არ არის და გადაკეთება სჭირდება. დაიწყეს გადაკეთება და შემდეგ მიხვდნენ, რომ საკმაოდ ხარჯიანი მანქანებია და საკმაოდ დიდი რაოდენობის საწვავსაც მოიხმარს. ასევე შესაბამისობაში არ მოდის თბილისთან და საერთოდ, საქართველოს სიტუაციისთვის. ხდება ის, რომ სისტემას მართავენ არაპროფესიონალები. სასწრაფო არ არის მხოლოდ მანქანა, ტელეფონი და ექიმი, ეს საკმაოდ რთული სისტემაა და ამას ცოდნა სჭირდება. როდესაც სასწრაფოს მართავენ ისეთი ადამიანები, რომლებიც საერთოდ ვერ ერკვევიან საკითხში, როდესაც ნარკოლოგიას მართავს გინეკოლოგი და არა ფსიქიატრი-ნარკოლოგი, ეს არის საქართველოს პრობლემა. შეხედეთ, გვჭირდება სასწრაფოები, მანქანები ნაყიდია, მაგრამ მათი გამოყენება უკვე ორი წელია არ ხდება," — განაცხადა ვატო სურგულაძემ.