Nvidia (NVDA)-მ კვარტალური შედეგები გამოაქვეყნა, რომელმაც ძირითადი პარამეტრებით უოლ სტრიტის ანალიტიკოსების მოლოდინებს გადააჭარბა. ექსპერტების თქმით, გაყიდვების რეკორდულ ნიშნულზე დაფიქსირება ბირჟის ინვესტორებს აფიქრებინებს, რომ ხელოვნური ინტელექტისთვის საჭირო ინფტრასტრუქტურაზე მოთხოვნა კვლავ მაღალ ნიშნულზე ნარჩუნდება.

2026 ფისკალური წლის მეორე კვარტლის მონაცემებით, Nvidia-ს შემოსავლებმა 46.74 მილიარდ დოლარს მიაღწია, რაც 56%-ით მეტია გასული წლის ანალოგიური პერიოდის მაჩვენებელთან შედარებით. გარდა ამისა, ეს რიცხვი აღემატება ანალიტიკოსების მოლოდინებსაც, რომელიც 46.2 მილიარდ დოლარზე იყო დაფიქსირებული.

ხელოვნური ინტელექტისთვის საჭირო ჩიპების მწარმოებელმა კომპანიამ EPS — ანუ მოგება ერთ აქციაზეც გამოაქვეყნა და თქვა, რომ ეს მაჩვენებელი 1,05 დოლარია. ანალიტიკოსების მოლოდინები EPS-თვის 1.01 დოლარი იყო.

Nvidia-მ აღნიშნა, რომ მისი მოგება გაიზარდა მას შემდეგ, რაც $180 მილიონი დოლარის ოდენობის სარგებელი მიიღო H20 ჩიპების გაყიდვიდან, რომელთა რეალიზაციაც მეორე კვარტლის განმავლობაში ჩინეთში აკრძალული იყო, თუმცა გაიყიდა სხვა ქვეყნებში. კომპანიაში ამბობენ, რომ მათ შეძლეს ჩინეთისთვის დარეზერვებული ჩიპების სხვა ბაზრებზე გაყიდვა. მათივე თქმით, ამის გარეშეც მათი EPS 1.04 დოლარი იქნებოდა.

მონაცემთა ცენტრების გაყიდვებმა, რაც Nvidia-ს შემოსავლის უმთავრეს ნაწილს შეადგენს, რეკორდულ $41.1 მილიარდს მიაღწია, თუმცა ეს მაჩვენებელი ოდნავ ჩამორჩა ანალიტიკოსების პროგნოზებს. როგორც გაირკვა, რამდენიმე მსხვილმა ტექნოლოგიურმა კლიენტმა ბოლო პერიოდში გამოაცხადა მასშტაბური ინვესტიციების გეგმები AI-ს ინფრასტრუქტურის განვითარებაში, რამაც ანალიტიკოსებს ზედმეტად ოპტიმისტური მოლოდინები გაუჩინა.

რაც შეეხება შემდეგი პერიოდის პროგნოზებს, კომპანიაში ამბობენ, რომ მომდევნო კვარტალში 54 მილიდარდი დოლარის შემოსავალს მიიღებენ (+- 2% ცდომილებით). უოლ სტრიტის ანალიტიკოსების შეფასებით კი, Nvidia-ს შემოსავალი 53,8 მილიარდი დოლარი იქნება. ცხადია, გასული წლების ხელოვნური ინტელექტის ბუმის ფონზე შემოსავლების ზრდის ტემპი შედარებით შემცირებული იქნება, თუმცა კომპანია რეკორდულად მაღალი შემოსავლების მიღებას ელოდება.

აქვე აღსანიშნავია, რომ პროგნოზში არ არის გათვალისწინებული H20 ჩიპების ჩინეთში გაყიდვების შესაძლო აღდგენა. Nvidia-ს ფინანსურმა დირექტორმა კოლეტ კრესმა განაცხადა, რომ ჩინეთში გაყიდვები ჯერ კიდევ არ აღდგენილა და აშშ-ის მთავრობის მხრიდან ეგრეთ წოდებული 15%-იანი შეთანხმების დაკანონებას ელოდებიან. Nvidia-ს აღმასრულებელმა დირექტორმა ჯენსენ ჰუანგმა კი აღნიშნა, რომ წელს ჩინეთის ბაზარი მათთვის $50 მილიარდიანი შემოსავლის მიღების შესაძლებლობას წარმოადგენს.

მიუხედავად იმისა, რომ კომპანიამ ძლიერი ფინანსური შედეგები გამოაქვეყნა, ოთხშაბათის ვაჭრობის შედეგად, მისი აქციების ღირებულება დაახლობით 3%-ით დაეცა. მიზეზად მონაცემთა ცენტრებიდან მიღებული შემოსავლის რაოდენობა და ჩინეთის ბაზართან დაკავშირებული არასტაბილურობა დასახელდა.

თუმცა, აქვე აღსანიშნავია, რომ მიმდინარე წლის დასაწყისთან შედარებით Nvidia-ს აქციები 34.16%-ით არის გაზრდილი. ამჟამად ამ კომპანიის ერთ აქციას 180.17 დოლარად შეიძენ. კომპანიის საბაზრო კაპიტალიზაცია 4.396 ტრილიონი დოლარია.

თუ ინვესტირების დაწყება გსურს, უნდა იცოდე, რომ ამისთვის ერთ-ერთი საუკეთესო საშუალება თიბისის მობაილბანკია. აქვე გეტყვით იმსაც, რომ საინვესტიციო გადაწყვეტილების მიღებამდე სიღრმისეული კვლევის ჩატარებაა რეკომენდებული. გაითვალისწინე, რომ ეს არ არის ფინანსური რჩევა.

შემოგვიერთდი ჯგუფში ინვესტიციები — ვაჭრობა საფონდო ბირჟაზე და ერთად განვიხილოთ საინვესტიციო სიახლეები და მიმდინარე ამბები.