გორის საკრებულოში მუნიციპალიტეტის საკრებულოს თავმჯდომარის, დავით რაზმაძის იმპიჩმენტის განაცხადი დაარეგისტრირეს. ინფორმაციას "მოზაიკა" ავრცელებს.

მათ ცნობით, გორის საკრებულოს თავმჯდომარის, დავით რაზმაძის იმპიჩმენტის განაცხადს ხელი მოაწერეს ერთიანი ნაციონალური მოძრაობის და გახარია — საქართველოს წევრებმა.

"ერთიან ნაციონალურ მოძრაობას შემოგვიერთდნენ გახარია — საქართველოსთვის წევრები და ჩვენთან ერთად ხელი მოაწერეს ერთობლივ განაცხადს თავმჯდომარის იმპიჩმენტის პროცედურებთან დაკავშირებით. დღეიდან ეს პროცესი დაიწყება ოფიციალურად", — განაცხადა ბექა ქორჩილავამ, ენმ-ს წევრმა გორის საკრებულოში.

შეგახსენებთ, გორის საკრებულოს თავმჯდომარემ ქართული ოცნებიდან, დავით რაზმაძემ New York Times-თან ინტერვიუში განაცხადა, რომ აგვისტოს ომში რუსები "მშვიდობისმყოფელებად მოვიდნენ" და "მიშას ხულიგნები მთელ ქალაქს ძარცვავდნენ". საზოგადოების მწვავე რეაქციის შემდეგ, დავით რაზმაძემ NYT-ის ჟურნალისტი, სკოტ ანდერსონი ინტერვიუს გაყალბებაში დაადანაშაულა. გორის ოცნების საკრებულოს თავმჯდომარეს New York Times-მა უპასუხა და განაცხადა, რომ სტატიაში დავით რაზმაძის სიტყვები სრული სიზუსტით დაიბეჭდა.