შეფასებისა და გამოცდების ეროვნულ ცენტრში (Naec) დადასტურებით ამბობენ, რომ დღეს, 25 აგვისტოს აბიტურიენტები უნივერსიტეტებში ჩარიცხვის, ან ვერ ჩარიცხვის შესახებ საბოლოო შედეგებს აღარ უნდა ელოდონ. NEWS.On.ge-ს Naec-ში განუცხადეს, რომ საბოლოო შედეგები კვირის განმავლობაში გამოქვეყნდება, თუმცა ზუსტ თარიღს არ ასახელებენ.

კითხვაზე, მოსალოდნელია თუ არა, რომ შედეგები არასამუშაო დღეებშიც გამოქვეყნდეს, Naec-ში ვერ გვპასუხობენ. (შეგახსენებთ, რომ ცოტა ხნის წინ გავრცელდა ინფორმაცია იმის შესახებ, რომ 29 აგვისტოს (პარასკევი) უქმე დღედ გამოცხადდა).

როგორც შეფასებისა და გამოცდების ეროვნულ ცენტრში გვითხრეს, საგრანტო კონკურსის და მაგისტრატურის შედეგების აპელაციამდე ჯერ აბიტურიენტები შეიტყობენ შედეგებს.

აღსანიშნავია, რომ გასულ წელს სკალირებული ქულები 22 აგვისტოს გამოქვეყნდა, უნივერსიტეტებში ჩარიცხვა/არ ჩარიცხვის შესახებ საბოლოო შედეგები კი იმავე თვის 27 რიცხვში. წელს კი აპელაციის შედეგები 20 აგვისტოს გახდა ცნობილი, სწორედ ამიტომ, აბიტურიენტები ვარაუდობდნენ, რომ მიმდინარე წელსაც აპელაციის შედეგებიდან 5 დღეში, ანუ დღეს, 25 აგვისტოს შეიტყობდნენ გახდნენ თუ არა სტუდენტები და კონკრეტულად რომელ უნივერსიტეტში ჩაირიცხნენ.

ცნობისთვის, 2025 წლის ერთიანი ეროვნული გამოცდებისათვის 39 000-ზე მეტი აბიტურიენტი დარეგისტრირდა; სტუდენტთა საგრანტო კონკურსში მონაწილეობის სურვილი 2 400-ზე მეტმა სტუდენტმა გამოთქვა; საერთო სამაგისტრო გამოცდისათვის რეგისტრაცია 10 000-ზე მეტმა მაგისტრანტობის კანდიდატმა გაიარა; მასწავლებლისა და მასწავლებლობის მსურველთა გამოცდებისათვის კი დარეგისტრირდა 24 300-ზე მეტი აპლიკანტი.

შეფასებისა და გამოცდების ეროვნული ცენტრის ინფორმაციით, 2025 წლის არჩევითი საგნების სტატისტიკა აბიტურიენტთა არჩევანის მიხედვით, ასე გამოიყურება:

— ისტორია აირჩია 18 900-ზე მეტმა აბიტურიენტმა;
— მათემატიკა აირჩია 13 700-ზე მეტმა აბიტურიენტმა;
— გეოგრაფია აირჩია 2 300-მა აბიტურიენტმა;
— ლიტერატურა აირჩია 1 400-ზე მეტმა აბიტურიენტმა;
— სამოქალაქო განათლება აირჩია 2 600-ზე მეტმა აბიტურიენტმა;
— ქიმია აირჩია 2 100-ზე მეტმა აბიტურიენტმა;
— ფიზიკა აირჩია 900-ზე მეტმა აბიტურიენტმა;
— ბიოლოგია აირჩია 3 200- ზე მეტმა აბიტურიენტმა;
— ხელოვნება აირჩია 200-ზე მეტმა აბიტურიენტმა.