სომხურმა ბანკებმა და ბროკერებმა, რუსეთთან ფინანსური ინფორმაციის ავტომატურად გასაცვლელად, რუს კლიენტებზე მონაცემების შეგროვება დაიწყეს. ინფორმაციას რუსული მედია ავრცელებს.

გამოცემა წერს, რომ მონაცემების შეგროვების მიზანია რუსეთთან ფინანსური ინფორმაციის პირველი ავტომატური გაცვლისთვის მზადებაა, რომელიც 2025 წლის სექტემბერშია მოსალოდნელი. რაც ნიშნავს იმას, რომ სომხეთში რუსების აქტივების შესახებ ინფორმაცია ფედერალური საგადასახადო სამსახურისთვის ხილული გახდება.

სომხეთის ფინანსურ ბაზარზე Frank Media-ს წყარომ დაადასტურა, რომ ფინანსური ინსტიტუტები ადგილობრივი მარეგულირებლებისგან იღებენ მოთხოვნას ინფორმაციის მიწოდების შესახებ. თუ ინფორმაციას არ მიაწოდებენ, მათი მომსახურება შეწყდება.

NSV Consulting-ის მმართველი პარტნიორი სერგეი ნაზარკინი სომხეთს "პოსტსაბჭოთა სივრცეში რუსების მიერ უცხოური ანგარიშების გახსნის ყველაზე პოპულარულ იურისდიქციას" უწოდებს. მისი თქმით, ეს არა მხოლოდ საბანკო ანგარიშებია, არამედ საბროკერო ანგარიშებიც, "რადგან რუსები სომხურ ინფრასტრუქტურას ფასიანი ქაღალდებით ვაჭრობისთვის იყენებენ".

რუსული მედია წერს, რომ ფინანსური ინფორმაციის გაცვლა ეკონომიკური თანამშრომლობისა და განვითარების ორგანიზაციის (OECD) სტანდარტის შესაბამისად ხორციელდება. სომხეთმა საგადასახადო ხელშეკრულებასთან დაკავშირებული ზომების განხორციელების შესახებ კონვენციას ხელი 2023 წლის სექტემბერში მოაწერა. ამავდროულად, სომხეთმა 2025 წლის სექტემბრისთვის აიღო ფინანსური ინფორმაციის ავტომატური გაცვლის ვალდებულება. სომხეთი ბანკის კლიენტების ფინანსურ ანგარიშებს წელიწადში დაახლოებით 120 ქვეყანასთან გაცვლის. რუსეთი ფინანსური ინფორმაციის გაცვლაში 2018 წლიდან მონაწილეობს. თუმცა, 2022 წელს ომის დაწყების შემდეგ, ევროპის ქვეყნების უმეტესობამ ეს გაცვლა დახურა (მათ შორის გერმანია, საფრანგეთი, იტალია, შვეიცარია, ბალტიის ქვეყნები და მრავალი სხვა). რუსეთმა, თავის მხრივ, ეს ქვეყნები არსებული სიიდან ამოიღო.