კანადის პრემიერმინისტრმა, მარკ კარნიმ უკრაინის პრეზიდენტ ვოლოდიმირ ზელენსკის განუცხადა, რომ კიევის მოთხოვნას მტკიცე უსაფრთხოების გარანტიების შესახებ შესაძლო სამშვიდობო შეთანხმების ფარგლებში მხარს უჭერს. მან ასევე აღნიშნა, რომ კანადა ასეთ მოდელში უკრაინაში სამხედროების გაგზავნასაც არ გამორიცხავს. ამის შესახებ ინფორმაციას Reuters ავრცელებს.

კარნი, რომელიც მარტში პრემიერმინისტრად არჩევის შემდეგ, პირველად ეწვია უკრაინას, ზელენსკისთან ერთად კიევის ცენტრში, დამოუკიდებლობის დღის აღსანიშნავ ცერემონიას დაესწრო. ღონისძიებას ტრამპის სპეციალური წარმომადგენელი კიტ კელოგიც ესწრებოდა.

"კანადის შეფასებით, არარეალისტურია, თუ ერთადერთი უსაფრთხოების გარანტია მხოლოდ უკრაინის შეიარაღებული ძალები იქნება… აუცილებელია მისი გამყარება და საერთაშორისო ჩართულობით გაძლიერება," — განაცხადა კარნიმ ერთობლივ პრესკონფერენციაზე.

Reuters-ის ინფორმაციით, უკრაინის და კანადის ლიდერებმა ხელი მოაწერეს დრონების ერთობლივი წარმოების შეთანხმებასაც. კარნის თქმით, უკრაინა მომავალ თვეში 1 მილიარდ კანადურ დოლარზე (723 მილიონი აშშ დოლარი) მეტის ღირებულების სამხედრო დახმარებას მიიღებს.