სახელმწიფო უსაფრთხოების სამსახურში 23 აგვისტოს განხორციელებულ საკადრო ცვლილებებს დემოკრატიის კვლევის (DRI ) ინსტიტუტი ეხმაურება და წერს, რომ ეს "უწყების პოლიტიზაციის მორიგი მტკიცებულებაა".

"ადგილობრივი თვითმმართველობის არჩევნების წინ და ქვეყანაში არსებული პოლიტიკური კრიზისის ფონზე, უსაფრთხოების სამსახურის ხელმძღვანელად „ქართულმა ოცნებამ“ ის პოლიტიკოსი შეარჩია, რომელიც მისი გუნდის ერთ-ერთი მთავარი სპიკერია და ხშირად გამოირჩევა პოლიტიკური ოპონენტების მიმართ რადიკალური, ანტიევროპული, მტრული რიტორიკით და საზოგადოებაში პოლარიზაციის გაღვივების მცდელობით.

23 აგვისტოს სახელმწიფო უსაფრთხოების სამსახურის უფროსმა ანრი ოხანაშვილმა დაკავებული თანამდებობა არასრული 5 თვიანი მუშაობის შემდეგ მოულოდნელად დატოვა. საზოგადოებისთვის ფარული დარჩა ის გარემოებები, რამაც მისი თანამდებობიდან წასვლა განაპირობა და ოხანაშვილის შემცვლელის, მამუკა მდინარაძის ვინაობაც საზოგადოებას უმალ, ყოველგვარი დემოკრატიული განხილვის გარეშე წარუდგინეს. ცხადია, ერთპარტიულ პარლამენტში სამსახურის ახალი უფროსის კანდიდატურაზე მსჯელობა კრიტიკული კითხვებისა და დებატების გარეშე ჩაივლის. მდინარაძის კანდიდატურის, ისევე როგორც მიმდინარე წლის აპრილის თვეში ოხანაშვილის, პარლამენტის მიერ დამტკიცება, მხოლოდ ფორმალურ იურიდიულ პროცედურად იქცა და უსაფრთხოების სექტორზე საპარლამენტო კონტროლის არანაირ ნიშანს არ ატარებს", — ნათქვამია დემოკრატიის კვლევის ინსტიტუტის მიერ გავრცელებულ განცხადებაში.

23 აგვისტოს ოცნების პრემიერმინისტრმა, ირაკლი კობახიძემ სუს-ის ხელმძღვანელის პოზიციაზე მამუკა მდინარაძე წარადგინა. მანამდე სახელმწიფო უსაფრთხოების სამსახურმა გაავრცელა განცხადება, სადაც აღნიშნულია, რომ ანრი ოხანაშვილი სუს-ის უფროსის თანამდებობას ტოვებს და ეროვნული უსაფრთხოების საკითხებში ოცნების პრემიერმინისტრის მრჩეველი ხდება.