"ჩვენი შეთავაზება იქნება ნაკლებად მძიმე აღკვეთის ღონისძიების გამოყენება, მათ შორის, საერთოდ აღმკვეთი ღონისძიების გაუქმება, ვინაიდან არ არსებობს არანაირი სამართლებრივი საფუძველი ბიჭები ყოფილიყვნენ დაკავებული," — ამის შესახებ თორნიკე თოხშუას და მინდია შერვაშიძის ადვოკატმა, ომარ ფურცელაძემ ფორმულასთან საუბრისას განაცხადა.

ადვოკატისთვის გაურკვეველია, რა მიზეზით დააკავეს აქტივისტები იმის გათვალისწინებით, რომ შემთხვევიდან თითქმის 18 დღეა გასული.

"ჩვენთვის გაურკვეველია, რა მიზეზით დააკავეს ისინი იმის გათვალისწინებით, რომ შემთხვევიდან გასულია თითქმის 18 დღე. ამ დროის განმავლობაში ისინი მონაწილეობდნენ მინიმუმ სამ საგამოძიებო მოქმედებაში, მათ შორის გამოიკითხნენ მაგისტრი მოსამართლის წინაშე. დღეს ველოდებით აღმკვეთი ღონისძიების სხდომის ჩანიშვნას, რომელიც აუცილებლად სამუშაო დღის ბოლომდე უნდა გაიმართოს, პროკურატურა ითხოვს პატიმრობას როგორც ამას ვარკვევთ მათ მიერ გავრცელებული რელიზიდან და ჩვენი შეთავაზება იქნება ბუნებრივია ნაკლებად მძიმე აღკვეთის ღონისძიების გამოყენება, მათ შორის, საერთოდ აღმკვეთი ღონისძიების გაუქმება, ვინაიდან არ არსებობს არანაირი სამართლებრივი საფუძველი ბიჭები ყოფილიყვნენ დაკავებული," — განაცხადა ადვოკატმა ფორმულასთან.

თორნიკე თოხშუას და მინდია შერვაშიძის სასამართლოს პროცესი დღეს 15:00 საათზეა ჩანიშნული.

თორნიკე თოშხუა და მინდია შერვაშიძე 16 აგვისტოს ჯგუფურად ჩადენილი ძალადობის ბრალდებით დააკავეს. შსს-ს ცნობით, დანაშაული 2 წლამდე ვადით თავისუფლების აღკვეთას ითვალისწინებს.

იურისტი საბა ბრაჭველი წერს, რომ 31 ივლისს "ბექა გოცირიძე ჯიბეში დანით და ხმამაღალი გინებით რუსთაველზე მივიდა, ჩხუბი თვითონ ატეხა, და პოლიციამ კი ის ადამიანები დაიჭირა, ვინც მას დანა წაართვეს".

პროკურატურამ 16 აგვისტოს დაკავებულ აქტივისტებს თორნიკე თოხშუას და მინდია შერვაშიძეს ბრალი ჯგუფურად განხორციელებული ძალადობის ფაქტზე წარუდგინა.

პროკურატურის მიერ გავრცელებულ ინფორმაციაში ნათქვამია, რომ უწყება ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.

ასევე იხილეთ: