"მაინტერესებს რა ტესტს ჩააბარებს ახლა შინაგან საქმეთა სამინისტრო, როდესაც მათი ტიტუშკა დასაჯარიმებელი ეყოლებათ," — ამის შესახებ ჟურნალისტმა ნანუკა ჟორჟოლიანმა განაცხადა, რომელიც ოცნების მხარდამჭერ ყოფილ ფეხბურთელს, ბექა გოცირიძეს სიტყვიერი შეურაცხყოფის გამო სასამართლოში უჩივის.

"გადავწყვიტე, რომ მათი ენით ველაპარაკო. ჯერ დავიწყოთ იქიდან, რომ ცრუ ჩვენება მისცა, რომლის შემდეგაც დააკავეს პატრიოტი ადამიანები, შესაბამისად, მაინტერესებს ტესტი ჩავუტარო ქართულ მართლმსაჯულებას, რომ მაშინ, როდესაც მე ბატის სმაილისთვის დამაჯარიმეს, მაინტერესებს როგორ იქცევა სახელმწიფო, შინაგან საქმეთა სამინისტრო, როცა მათი ტიტუშკები ასე მოგვმართავენ ჩვენ. ნანუკას ხსენებით ინგეიჯმენტის მომატებით და ქოცების გაპოპულარულებით დავიღალე. ნანუკას თუ ახსენებს ასეთი უმორალო ადამიანი, ჩათვლის, რომ ამით უფრო მეტ ქულას დაიწერს ქართული ოცნების ლიდერშიფში. იმ სიტყვებს, რითაც მე ის პირდაპირ ეთერში მომმართავს, მე მას არ ვაპატიებ, გამორიცხული ამბავია და შესაბამისად, მაინტერესებს რა ტესტს ჩააბარებს ახლა შინაგან საქმეთა სამინისტრო, როდესაც მათი ტიტუშკა დასაჯარიმებელი ეყოლებათ," — განაცხადა ნანუკა ჟორჟოლიანმა TV პირველთან.

შეგახსენებთ, რომ ყოფილი ფეხბურთელი ბექა გოცირიძე ქართული ოცნების მხარდამჭერია. ის ფიგურირებს 16 აგვისტოს დაკავებული აქტივისტების, თორნიკე თოშხუასა და მინდია შერვაშიძის საქმეში, რომლებიც შსს-მ ჯგუფურად ჩადენილი ძალადობის ბრალდებით დააკავეს.

იურისტი საბა ბრაჭველი წერს, რომ 31 ივლისს "ბექა გოცირიძე ჯიბეში დანით და ხმამაღალი გინებით რუსთაველზე მივიდა, ჩხუბი თვითონ ატეხა, და პოლიციამ კი ის ადამიანები დაიჭირა, ვინც მას დანა წაართვეს".

ნანუკა ჟორჟოლიანმა ბექა გოცირიძე სოციალურ ქსელში "ნასედკად" და პროვოკატორად მოიხსენია, გოცირიძემ კი ვიდეო გაავრცელა, სადაც ნანუკა ჟორჟოლიანს შეურაცხყოფას აყენებს.