საქართველოს ახალგაზრდა იურისტთა ასოციაციის კვლევის მიხედვით, ადმინისტრაციული ორგანოები, რომლებსაც საჯარო ინფორმაციის გაცემის ვალდებულება აქვთ თითქმის ყოველ მეხუთე წერილს უპასუხოდ ტოვებენ, ან უარს ამბობენ ინფორმაციის გაცემაზე. დღეს, 28 სექტემბერს ორგანიზაციამ რვათვიანი პერიოდის დაკვირვების შედეგები გამოაქვეყნა. ამ პერიოდში სულ 277 განცხადება გაიგზავნა.

კვლევიდან ირკვევა, რომ ადმინისტრაციულ ორგანოებში შესული წერილების მხოლოდ 66,4 პროცენტ შემთხვევაში გაიცა სრულყოფილი პასუხი. სხვა მონაცემები კი ასე გადანაწილდა: ნაწილობრივ - 11,6 პროცენტი; უარი - 9,4 პროცენტი, უპასუხოდ დატოვებული წერილები - 8,7 პროცენტი; ანგარიშის დროს მიმდინარე წერილები - 3,9 პროცენტი.

"ზემოაღნიშნული პრობლემების ფონზე, კიდევ უფრო მნიშვნელოვანია, რომ საქართველოს მთავრობამ დროულად უზრუნველყოს ინფორმაციის თავისუფლების კანონმდებლობის რეფორმა, რომელიც მიუხედავად ყველა თვალსაზრისით მაღალ დონეზე მომზადებული კანონპროექტის, გაურკვეველი მიზეზებით ჭიანურდება", - აღნიშნავენ საიაში და ადმინისტრაციულ ორგანოებს მოუწოდებენ, საჯარო ინფორმაციის გაცემის დროს, საქართველოს კანონმდებლობას დაემორჩილონ.

ფოტო: საია