ჟურნალ Playboy-ს დამაარსებელი და უცვლელი მთავარი რედაქტორი, ჰიუ ჰეფნერი 91 წლის ასაკში ლოს-ანჯელესში, საკუთარ სახლში ბუნებრივი სიკვდილით გარდაიცვალა.

ჰიუ ჰეფნერმა ჟურნალის პირველი ნომერი 1953 წელს საკუთარ სამზარეულოს მაგიდაზე მოამზადა. პირველი ნომრის ყდა მერლინ მონრომ დაამშვენა. უკვე რამდენიმე თვეში Playboy მსოფლიოში კაცების ყველაზე გაყიდვადი ჟურნალი გახდა. 1970-იან წლებში, პოპულარობის პიკში Playboy-ს ტირაჟი შვიდ მილიონს აღწევდა, თუმცა ბოლო დროს ჟურნალის ტირაჟი 800 ათასზე მეტი არ ყოფილა.

მოდელების შიშველი ფოტოების გარდა, ჟურნალში იბეჭდებოდა ინტერვიუები ფიდელ კასტროსთან, ჯონ ლენონთან, მარტინ ლუთერ კინგთან, ასევე გამოქვეყნდა რამდენიმე მწერლის მოთხრობა. მათ შორის იყვნენ, ვლადიმერ ნაბოკოვი, კურტ ვონეგუტი, იან ფლემინგი, სტივენ კინგი, გაბრიელ გარსია მარკესი და სხვები.

"არასდროს მივიჩნევდი, რომ Playboy იყო ჟურნალი მხოლოდ სექსზე. ჩემთვის ის ყოველთვის იყო ჟურნალი ცხოვრების წესზე, რომელშიც სექსი მნიშვნელოვან შემადგენელ ნაწილს შეადგენს," - განაცხადა ჰეფნერმა ერთ-ერთ ინტერვიუში.

დღეისათვის ჟურნალი Playboy ოცზე მეტ ქვეყანაში გამოიცემა. ცოტა ხნის განმავლობაში ის საქართველოს ბაზარზეც იყო. ჰიუ ჰეფნერის ქონება $50 მილიონად არის შეფასებული.

აპრილში ტელეეკრანებზე გამოვიდა The Amazon-ის სერიალი, რომელიც თავიდან ბოლომდე გვიყვება ისტორიას იმის შესახებ, თუ როგორ შეიქმნა მსოფლიოში ერთ-ერთი ყველაზე ცნობილი ბრენდი Playboy.

სერიალის შემქმნელებმა ათასობით ფოტო და ვიდეო მასალა შეისწავლეს, ჰეფნერთან ხანგრძლივი ინტერვიუ ჩაწერეს და მოიპოვეს უნიკალური, 2 600-საათიანი დოკუმენტური ვიდეო მასალა, რომელსაც მაყურებელი პირველად სწორედ ამ შოუში ნახავს.