მოქალაქე ამბობს, რომ აღიარებითი ჩვენების მისაღებად პოლიციის თანამშრომელმა აწამა. შემთხვევას გამოეხმაურა საქართველოს სახალხო დამცველი, უჩა ნანუაშვილი და საქართველოს პროკურატურისგან გამოძიების დაწყება მოითხოვა.

სახალხო დამცველის ინფორმაციით, დაკავებულ პირს, სასურველი ჩვენების მისაღებად, თავის არეში დაარტყეს, შემდეგ თავზე ჩამოაცვეს პარკი და კისერთან ისე მოუჭირეს, რომ სუნთქვა გაუჭირდა.

"პარკი მხოლოდ მაშინ მოხსნეს, როცა აღიარებითი ჩვენების მიცემას და ოქმზე ხელმოწერას დათანხმდა. მისი მტკიცებით, პოლიციელი ურტყამდა თავის არეში ფეხსაცმელებით. ასევე, მიაყენეს სიტყვიერი შეურაცხყოფა, ემუქრებოდნენ ოჯახის წევრების გაუპატიურებით, ცემის დროს გონებაც დაკარგა", - აღნიშნულია ომბუდსმენის განცხადებაში.

მისივე ინფორმაციით, ბრალდებულმა დროებითი მოთავსების იზოლატორში დაზიანებების აღწერისას მათი წარმოშობის მიზეზის წერილობითი ფორმით დაფიქსირებაზე შიშის გამო უარი თქვა. თუმცა ძალადობის შესახებ თბილისის საქალაქო სასამართლოში ისაუბრა.