"რეზოლუცია ევროპარლამენტის მიერ გაგონილი ქართველი ხალხის ხმაა, როგორც [ქვეყანაში არსებული] ვითარების შეფასებაზე, ასევე, ამ ვითარებიდან გამოსვლაზე," — ამის შესახებ კოალიცია ცვლილებისთვის ერთ-ერთმა ლიდერმა, ელენე ხოშტარიამ ბრიფინგზე განაცხადა.

მისი თქმით, ევროპარლამენტმა ვერდიქტი დაუსვა როგორც ქართულ ოცნებას, ასევე უდიდესი მხარდაჭერა გამოხატა ყველა იმ პოზიციის მიმართ, რომელიც ისმის რუსთაველზე.

"[ევროპარლამენტის რეზოლუციის ტექსტი] არ არის ჩემი სიტყვები, არ არის კოალიციის სიტყვები, ეს არ არის ოპოზიციური პარტიების სიტყვები, ეს არ არის რუსთაველზე მდგომი ადამიანების სიტყვები, ეს არის ევროპარლამენტის მიერ გაგონილი ქართველი ხალხის ხმა, როგორც ვითარების შეფასებაზე, ასევე, ამ ვითარებიდან გამოსვლაზე.

ევროპარლამენტმა მიიღო 2-წლიანი შეფასების უმნიშვნელოვანესი დოკუმენტი და ვერდიქტი დაუსვა როგორც ქართულ ოცნებას, ასევე უდიდესი მხარდაჭერა და პრაქტიკულად, უდიდესი პატივისცემა გამოხატა ყველა იმ პოზიციის, შეგრძნების, აზრის მიმართ, რომელიც ისმის რუსთაველზე და ჩვენს ამ დიდ პროევროპულ, პროქართულ ბრძოლაში.

აქვე, ამ რეზოლუციაში საუბარია ქართული ოცნების მიმართ კონკრეტულ სადამსჯელო გადაწყვეტილებებზე, საკმაოდ მტკივნეულზე. ევროპა გამოხატავს მოქმედების მზაობას. ამიტომ, ეს არის ნამდვილად ძალიან დიდი გამარჯვება ჩვენი პროდასავლური, ჩვენი პროქართული, პროეროვნული საერთო ეროვნული ბრძოლის. ყველა ადამიანმა, რომელიც იბრძვის, იქნება ის ახლა ციხეში და საკნიდან გვიყურებს, იქნება რუსთაველზე, სასამართლოს ეზოში თუ ნებისმიერ ადგილას, უნდა იცოდეს, რომ ყველა თქვენს მოქმედებას აქვს უდიდესი აზრი იმიტომ რომ ის ესმის მსოფლიოში, ევროპაში ყველაზე ძლიერ სახელმწიფოთა წარმომადგენლებს" — განაცხადა ელენე ხოშტარიამ.

დღეს, 9 ივლისს ევროპარლამენტმა 490 ხმით, 147-ის წინააღმდეგ საქართველოს შესახებ მორიგი კრიტიკული რეზოლუცია მიიღო, რომელიც საქართველოში ჩატარებულ ბოლო საპარლამენტო არჩევნებსა და ოცნების ხელისუფლების ლეგიტიმურობას არ აღიარებს. 32-პუნქტიანი ანგარიში საქართველოს 2023-2024 წლების ვითარებას შეეხება და მოუწოდებს ევროკომისიას, გადახედოს ევროკავშირსა და საქართველოს ასოცირების შეთანხმების შესრულებას, იმის ფონზე, რომ საქართველო უხეშად არღვევს შეთანხმების მე-2 მუხლით განსაზღვრულ ზოგად პრინციპებს. ამას გარდა, ანგარიში შეშფოთებას გამოთქვამს ოპოზიციის ლიდერების დაკავების გამო და პოლიტპატიმრების გათავისუფლებას ითხოვს. ევროპარლამენტი ევროკავშირის ქვეყნებს მოუწოდებს დამოუკიდებლად დაუწესონ სანქციები ოცნების ხელისუფლებას დემოკრატიული უკუსვლის გამო. ანგარიშში მოთხოვნილია ქვეყნის SWIFT-დან გათიშვა და სექტორული სანქციების დაწესება.

ასევე იხილეთ:

• გიორგი ვაშაძე: "ევროპარლამენტის რეზოლუცია არის ქართველი ხალხის უწყვეტი წინააღმდეგობის შედეგი"
• ევროპარლამენტმა საქართველოს შესახებ მორიგი კრიტიკული რეზოლუცია მიიღო