დემოკრატიული ინსტიტუტებისა და ადამიანის უფლებების ოფისი (ODIHR) ოცნების ხელისუფლების მიერ მიღებული სადავო კანონების შესახებ განცხადებას ავრცელებს და აღნიშნავს, რომ "სულ უფრო მზარდ შეშფოთებას იწვევს კანონმდებლობა, რომელიც ზღუდავს სამოქალაქო საზოგადოების მუშაობას, მშვიდობიანი პროტესტის მონაწილეების დაკავება და სისხლისსამართლებრივი დევნა, ასევე ოპოზიციის ლიდერების ბოლო დროს დაკავებები".

ODIHR შეშფოთებას გამოთქვამს, საქართველოს ხელისუფლების გადაწყვეტილებაზე არ მოიწვიოს მათი წარმომადგენლები ადგილობრივი არჩევნების დაკვირვებისთვის — რაც, მათი თქმით, საქართველოს მიერ ბოლო ორი ათწლეულის განმავლობაში დამკვიდრებული პრაქტიკის დარღვევას წარმოადგენს.

"ღრმა შეშფოთებით ვადევნებთ თვალს მიმდინარე მოვლენებს საქართველოში, განსაკუთრებით ოპოზიციური პოლიტიკოსების დაკავებისა და მსჯავრდების ფონზე. ჩვენ ასევე მოვუწოდებთ ხელისუფლებას, გააუქმოს ახალი კანონმდებლობა, რომელიც ზღუდავს სამოქალაქო საზოგადოების ლეგიტიმურ საქმიანობას," — განაცხადა ODIHR-ის დირექტორმა მარია ტელალიანმა. მისი თქმით, "სამოქალაქო და პოლიტიკური უფლებები დემოკრატიისა და კანონის უზენაესობის საყრდენია".

ODIHR განსაკუთრებულ შეშფოთებას გამოხატავს ბოლო თვეებში ათეულობით დემონსტრანტის დაკავებისა და სამართლიანი სასამართლოს სტანდარტების უგულებელყოფის შესახებ ცნობებზე, ასევე ადამიანის უფლებების დამცველებსა და სამოქალაქო საზოგადოების წარმომადგენლებზე გაზრდილ ზეწოლაზე მათ ლეგიტიმურ საქმიანობაში ხელის შეშლის მიზნით. გარდა ამისა, ბოლო კვირებში დაკავებულია ოპოზიციის რვა ლიდერი, რომელთა უმეტესობას პატიმრობა შეეფარდა.

გასულ წელს ODIHR-მა სამართლებრივი შეფასების საფუძველზე მოუწოდა საქართველოს, რომ გააუქმოს ე.წ. "უცხოელი აგენტების შესახებ" კანონი და გააფრთხილა, რომ სამოქალაქო საზოგადოების ორგანიზაციების რეგულირებაზე მიმართული ახალი კანონმდებლობა მათ გაძლიერებას კი არა, საქმიანობის შეზღუდვას გამოიწვევს. მიმდინარე წლის მარტში ოფისმა სერიოზული შეშფოთება გამოთქვა დემონსტრაციების და შეკრებების რეგულაციაში შეტანილ ცვლილებებთან დაკავშირებითაც, განაცხადა რა, რომ გათვალისწინებული სანქციები ზედმეტად მკაცრია და წინააღმდეგობაში მოდის საერთაშორისო ადამიანის უფლებათა სტანდარტებთან.

ეუთოს მონაწილე სახელმწიფოებმა ერთობლივად აღიარეს, რომ "კანონის უზენაესობა უნდა ეფუძნებოდეს საერთაშორისოდ აღიარებული ადამიანის უფლებების პატივისცემას, მათ შორის სამართლიანი სასამართლოს უფლებას, ეფექტური სამართლებრივი დაცვის საშუალებას და თვითნებური დაკავებისა და პატიმრობისაგან დაცვის გარანტიას." მათ ასევე გაუსვეს ხაზი ადამიანის უფლებათა დამცველების დაცვის აუცილებლობას. გარდა ამისა, სახელმწიფოებმა შეთანხმდნენ, რომ პატივი უნდა სცენ პოლიტიკური პარტიების შექმნის უფლებას და უზრუნველყონ მათი თანაბარი პირობებით კონკურენცია.

ODIHR-ს აღელვებს საქართველოს ხელისუფლების განზრახვა, არ მოიწვიოს ოფისი ადგილობრივი არჩევნების დაკვირვებისთვის — რაც საქართველოს მიერ ბოლო ორი ათწლეულის განმავლობაში დამკვიდრებული პრაქტიკის დარღვევას წარმოადგენს. ODIHR კვლავ მზად არის, დააკვირდეს არჩევნებს, თუ ხელისუფლება დროულად გააგზავნის მოწვევას — გამჭვირვალობისა და დემოკრატიული ინსტიტუტებისადმი საზოგადოებრივი ნდობის გაზრდის მიზნით.

"ODIHR რჩება მზად საქართველოს დასახმარებლად ეუთოს ვალდებულებების შესრულებაში და ვიმედოვნებთ, გავაგრძელებთ ჩვენს ხანგრძლივ თანამშრომლობას როგორც საქართველოს ხელისუფლებასთან, ისე სამოქალაქო საზოგადოებასთან, დემოკრატიული მმართველობისა და ადამიანის უფლებების განმტკიცების მიზნით", — დასძინა ODIHR-ის დირექტორმა, მარია ტელალიანმა.