"ოცნების" პარლამენტის თავმჯდომარე შალვა პაპუაშვილმა ჟურნალისტების მიერ დასმულ შეკითხვაზე — შეეხება თუ არა ყაველაშვილის შეთავაზება საქართველოს მესამე პრეზიდენტ მიხეილ სააკაშვილს, განაცხადა, რომ სააკაშვილი უკრაინის მოქალაქეა და მას არ აქვს უფლება ჩაერთოს არჩევნებში.

"არა, უკრაინის მოქალაქეების მიმართ ეს შეთავაზება, რა თქმა უნდა, არ მოქმედებს! უკრაინას ის ცოდვაც ეყოფა, დღეს მისი პოლიტიკური ელიტა როგორც მტრობს ქართველ ხალხს. უკრაინის პოლიტიკურ ელიტას ეს ცოდვაც ეყოფა. მისი მოქალაქე, რომ არჩევნებში ჩაერთოს ეს დაუშვებელია. რაც შეეხება მის პარტიას, განაცხადოს მისმა პარტიამ უნდა არჩევნებში მონაწილეობა თუ არა. წინ არის ყველაფერი, არანაირ კავშირში ეს მიხეილ სააკაშვილის შეწყალებასთან არ არის. პრეზიდენტის შეთავაზებას აქვს კონკრეტული საფუძველი, რატომ არის ეს შეთავაზება გაკეთებული? — იმისთვის რომ ხედავთ არის მცდელობა, მათ შორის უცხოური დაფინანსებით მოხდეს არჩევნების საბოტაჟი.

ვხედავთ, რომ "ლელომ" განაცხადა, სურს არჩევნებში მონაწილეობა. შემდეგ რომ არ იყოს ამ საბაბით საუბარი თითქოს არ ჰქონდათ სრულფასოვანი საარჩევნო კამპანიის წარმოების შესაძლებლობა ლიდერებს, ვინაიდან კანონიერ სასჯელს იხდიდნენ, სწორედ ამიტომ არის ეს შეთავაზება, რომ თუ არის სურვილი, მიიღონ მონაწილეობა არჩევნებში.

პრეზიდენტი მზადაა, რომ შეიწყალოს ისინი, რათა ჰქონდეთ საარჩევნო კამპანიაში სრულფასოვნად ჩართვის შესაძლებლობა. მიხეილ სააკაშვილი არის უკრაინის მოქალაქე, მას არათუ ჩართვის, საერთოდ ჩვენს არჩევნებზე საუბრის შესაძლებლობაც წესით არ უნდა ჰქონდეს, იმიტომ, რომ ეს არის ჩარევა. [მიხეილ ყაველაშვილის] განცხადება იყო მკაფიო, შეეხება იმ რამდენიმე პოლიტიკოსს, რომელმაც დაარღვია საქართველოს კონსტიტუცია, კანონმდებლობა, იცოდნენ რა სასჯელიც ემუქრებოდათ და სხვათა შორის, მიიღეს უფრო მსუბუქი სასჯელი, მათთვის არის შეთავაზება გაკეთებული", — განაცხადა პაპუაშვილმა.

ცნობისთვის, მიხეილ ყაველაშვილმა პოლიტპატიმრებს შესთავაზა შემდეგი რამ: თუ ისინი 4 ოქტომბრის თვითმმართველობის არჩევნებში მონაწილეობას მიიღებენ, მაშინ "ოცნების" პრეზიდენტი მათ შეიწყალებს.

თვითმმართველობის არჩევნებში მონაწილეობის სურვილი ოპოზიციურმა ორმა ოპოზიციურმა პარტიამ გამოთქვა, რომელთა შორის არიან: პარტია "ლელო" და პარტია — "გახარია საქართველოსთვის".

საპატიმროში მამუკა ხაზარაძის, ბადრი ჯაფარიძის და გიორგი გახარიას გარდა იმყოფებიან ოპოზიციური პარტიების ლიდერები: ზურაბ ჯაფარიძე, გიორგი ვაშაძე, ნიკა გვარამია და ნიკა მელია.