ოცნების პარლამენტის თავმჯდომარემ, შალვა პაპუაშვილმა დღეს გამართულ ბრიფინგზე განაცხადა, რომ "გადამდგარი ელჩის, რობინ დანიგანის განცხადებაზე რაიმე კომენტარის გაკეთება მათი ინტერესის სფერო არ არის".

"თავად პრეზიდენტ ტრამპის მიერ პროპაგანდისტობაში მხილებული „რადიო თავისუფლება" ავრცელებს გადამდგარი ელჩის ინტერვიუს. არც ერთი, არც მეორე ჩვენთვის საინტერესო არ არის. როდესაც პროპაგანდისტული მედია, თავად ტრამპის მიერ არის მხილებული, დაფინანსება შეწყვეტილი და მისი სურვილია, რომ დაიხუროს საერთოდ „რადიო თავისუფლება", როგორც პროპაგანდისტული ინსტრუმენტი. შეგახსენებთ, რომ თავის დროზე „რადიო თავისუფლება" შექმნა ცენტრალურმა სადაზვერვო სამსახურმა, სააგენტომ და მისი ბიუჯეტიდან ფარულად ფინანსდებოდა. შემდეგ გარკვეული სხვა სქემები დალაგდა, თუმცა ეს არის ოფიციალურად პროპაგანდისტული მედია და მათი მხრიდან გადამდგარი ელჩის ინტერვიუს გავრცელებაზე ზედმეტ კომენტარს ვერ გავაკეთებ", — აცხადებს შალვა პაპუაშვილი.

ჟურნალისტის კითხვაზე, რით დაემუქრა ქართული ოცნება ტრამპის ადმინისტრაციას?

შალვა პაპუაშვილი პასუხობს, რომ "გადამდგარი ელჩის განცხადებაზე რაიმე კომენტარის გაკეთება მათი ინტერესის სფერო არ არის”.

"ჩვენს შორის ვადამდე ვინ გადადგა, ცნობილია. არ არის ჩვენი ინტერესის სფერო, რომ გადამდგარი ელჩის განცხადებაზე კომენტარის გაკეთება. ეს ჩვენი ინტერესს სფერო არ არის", — თქვა პაპუაშვილმა.

გუშინ, 6 ივლისს რადიო თავისუფლებამ გამოაქვეყნა საქართველოში აშშ-ის ელჩის, რობინ დანიგანის ინტერვიუ, სადაც ის აცხადებს, რომ "ქართული ოცნების" მიერ დონალდ ტრამპისადმი მიწერილი არასაჯარო წერილი იყო "მუქარის შემცველი, შეურაცხმყოფელი, არასერიოზული და უკიდურესად ცუდად იყო მიღებული ვაშინგტონში".